ປະຫວັດຄວາມເປັນມາ

ປະຫວັດຄວາມເປັນມາ

ວິທະຍາໄລເຕັກນິກສັບພະວິຊາ
ວິທະຍາໄລເຕັກນິກສັບພະວິຊາ ຕັ້ງຢູ່ທິດຕາເວັນອອກ ກິໂລແມັດທີສາມນະຄອນຫຼວງວຽງຈັນ ມີເນື້ອທີ່ 9,2 ເຮັກຕາແມັດ ພາຍໃຕ້ໂຄງການຊ່ວຍເຫຼືອ ຂອງລັດທະບານ ອາດີດສະຫະພາບໂຊຫວຽດ ຊື່ງໄດ້ເອີ້ນຊື່ໂຄງການວ່າ ໂຄງການກໍ່ສ້າງໂຮງຮຽນ ສັບພະວິຊາ ເພື່ອສ້າງວິຊາການດ້ານໄຟຟ້າ  ແລະ ບໍ່ແຮ່ຂອງສ ປປ ລາວ ໂຄງການດັ່ງກ່າວໄດ້ອອກແບບໂດຍທີມງານວິສະວະກອນນັກສະຖາປານິກຂອງລັດເຊຍ.

–          ອໍານວຍການຝ່າຍອອກແບບ                ອາເລັກ ໂປຼດຕົກກິນ (  A. Potokine )

–          ຫົວໜ້າວິສະວະກອນຝ່າຍອອກແບບ       ອາເລັກ ໂຊນແຊບ  ( A. sonsep )

–          ຫົວໜ້າຝ່າຍເຕັກນິກອອກແບບ            ແຊກໄກ ບັດດາແອບ ( C. Badaeb )

ສະຖານທີ່ສຶກສາແຫ່ງນີ້ ໄດ້ຖືກອອກແບບຂື້ນໃນປີ 1979  ທີ່ປ່າສັກສິດບ້ານສະພານທອງໃຕ້ ແລະ ສ່ວນໜື່ງຂອງບ້ານໂສກປ່າຫຼວງ ດ້ວຍສີມືອັນປານິດຂອງນັກອອກແບບຊາວລັດເຊຍ ໄດ້ຈັດວາງບັນດາອາຄານສະຖານທີ່ດ້ວຍຄວາມກົມກຽວກັບສະພາບແວດລ້ອມຂອງທໍາມະຊາດແຫ່ງນີ້ເຮັດໃຫ້ຜູ້ຄົນກາຍໄປກາຍມາສາມາດ ແນມເຫັນສິ່ງກໍ່ສ້າງໃນໂຮງຮຽນແຫ່ງນີ້ດ້ວຍຄວາມສວຍງາມ ແລະ ສະດຸ້ງໃຈ.
ໂຄງການກໍ່ສ້າງໄດ້ດໍາເນີນໄປແຕ່ 1979 – 1986 ຈຶ່ງສໍາເລັດ ແລະ ໄດ້ໃສ່ຊື່ໂຮງຮຽນວ່າ: ໂຮງຮຽນຊັບພະວິຊາ ມິດຕະພາບລາວ-ໂຊຫວຽດ ປະກອບມີ:

–          ອາຄານຮຽນສອງຊັ້ນ ໜື່ງຫຼັງ ສາມາດຮອງຮັບນັກຮຽນໄດ້ເຖີງ 1,000 ກ່ວາຄົນ

–          ມີອາຄານຫໍພັກ 3 ຊັ້ນ 5 ຫຼັງ ສາມາດບັນຈຸນັກຮຽນໄດ້ເຖີງ 1,000 ກ່ວາຄົນ

–          ມີອາຄານຝືກງານຂອງບັນດາໂຮງຊ່າງໄຟຟ້າ, ບໍ່ແຮ່

–          ມີອາຄານຫ້ອງສະໜຸດ ແລະ ສະໂມສອນ ສາມາດບັນຈຸເຖີງ 405 ບ່ອນນັ່ງ

–          ມີເດີນກິລາບານເຕະ, ເດີ່ນກິລາໃນຮົມ ແລະ ເດີ່ນກິລາກາງແຈ້ງ ສາມາດເຮັດກິດຈະກໍາ ກິລາທຸກປະເພດໄດ້ຢ່າງສະດວກສະບາຍ

–          ນອກນີ້ຍັງມີຫໍພັກສໍາລັບຄູອາຈານພະນັກງານ ແລະ ຄະນະອໍານວຍການຜູ້ບໍລິຫານ ສະຖາບັນແຫ່ງນີ້

–          ເລີ້ມຕົ້ນເດືອນ 01-1986 ໂຮງຮຽນດັ່ງກ່າວໄດ້ໄຂສົກຮຽນທໍາອິດ ຢ່າງເປັນທາງການໄດ້ດໍາເນີນການຮຽນການສອນ ໃນ 7 ສາຂາວິຊາສະເພາະຄື:

1. ໄຟຟ້າທົ່ວໄປ
2. ໄຟຟ້ານ້ຳຕົກ
3. ໄຟຟ້າກົນຈັກ
4. ຊອກຄົ້ນແຮ່
5. ຂຸດຄົ້ນແຮ່
6. ປຸງແຕ່ແຮ່
7. ສໍາຫຼວດແຮ່

ປີ 1990 ໂຄງການຊ່ວຍເຫຼືອຂອງອາດິດສະຫະພາບໂຊກຫວຽດ ຕໍ່ໂຮງຮຽນດັ່ງກ່າວ ໄດ້ສີ້ນສຸດລົງ ເຮັດໃຫ້ການຄຸ້ມຄອງບໍລິຫານໂຮງຮຽນ ການສອນພົບຂໍ້ຫຍຸ້ງຍາກ ຍ້ອນຂາດງົບປະມານ ມາສະໜັບສະໜູນ ມີຄູອາຈານຈໍານວນໜື່ງໄດ້ອອກໄປເຮັດວຽກໃນຂົງເຂດທຸລະກິດ ແລະ ຈໍານວນໜື່ງກໍ່ຍັງໄປປະກອບການບ່ອນໃໝ່ເຮັດໃຫ້ມີຜົນສະທ້ອນຕໍ່ການປະຕິບັດຫຼັກສູດ, ດ້ວຍເຫດນີ້ທາງໂຮງຮຽນຈຶ່ງໄດ້ຫຼຸດ ຈໍານວນສາຂາວິຊາຮຽນຈາກ 7 ສາຂາມາເປັນ 3 ສາຂາຄື:

1. ຊ່າງໄຟຟ້າທົ່ວໄປ
2. ຊ່າງຊອກຄົ້ນ ແລະ ສໍາຫຼວດແຮ່
3. ຊ່າງຂຸດຄົ້ນ ແລະ ປຸງແຕ່ແຮ່

ສາມາດຮັບນັກຮຽນຈົບ ມໍ ປາຍ ປີລະ 10-200 ຄົນ ເທົ່ານັ້ນ ມາເຖິງປີ 1996 ທາງ ກະຊວງສຶກສາທິການ ໄດ້ຮັບຮອງການມອບຮັບຮອງການມອບຮັບ ໂຮງຮຽນວັດແທກ-ແຜນທີ່ຊັ້ນກາງ ສຳນັກງານນາຍົກລັດຖະມົນຕີມາເຂົ້າກັບໂຮງຮຽນສັບພະວິຊາມິດຕະພາບລາວ-ໂຊວຽດ ຕາມຂໍ້ຕົກລົງ ເລກທີ່ 564/ສສ 96 ເຮັດໃຫ້ໂຮງຮຽນແຫ່ງນີ້ ເພີ້ມອີກໜື່ງສາຂາວິຊາຮຽນ ຄືຊ່າງວັດແທກ ແລະ ແຜນທີ່.

ພາຍຫຼັງສອງສະຖາບັນໄດ້ຮ່ວມຕົວເຂົ້າກັນ ມັນໄດ້ເປັນການເພີ້ມກຳລັງແຮງທາງດ້ານພະນັກງານ ແລະ ໄດ້ມີການປັບປຸງການຈັດຕັ້ງພາຍໃນເຮັດໃຫ້ການບໍລິຫານງານຄ່ອງຕົວຍິ່ງຂື້ນ ສິ່ງສຳຄັນ ແມ່ນໄດ້ປັບປຸງວຽກພັກພະນັກງານ ແລະ ອົງການຈັດຕັ້ງມະຫາຊົນເຮັດໃຫ້ຄູອາຈານ ແລະ ພະນັກງານມີຄວາມສະຫງົບທາງດ້ານແນວຄິດ ແລະ ວຽກງານໄດ້ເດີນແມ່ນແລ່ນສະດວກດີຍິ່ງໆຂື້ນ.

ປີ 2000 ໄດ້ປ່ຽນຊື່ມາເປັນ ໂຮງຮຽນເຕັກນິກສັບພະວິຊາ ຕາມດຳລັດຂອງລັດຖະມົນຕີ ກະຊວງສຶກສາທິການ ເລກທີ່ 176/ສສ.ອສ 99 ລົງວັນທີ່ 04/02/1999 ພາຍໃຕ້ການເຮັດວຽກງານເປນທີມງານ ຂອງຄະນະອຳນວຍການ ແລະ ວິຊາການແຕ່ລະຫ້ອງການ ຊື່ງມີຄະນະພັກເປັນຜູ້ຊີ້ນຳ ໄດ້ວາງແນວທາງນະໂຍບາຍພັດທະນາໂຮງຮຽນຄືນໃໝ່ ເພື່ອກອບກູ້ເອົາຊື່ສຽງ ແລະ ຄຸນນະພາບມາໃຫ້ໂຮງຮຽນຄື : ປະຕັບັດຕາມທິດຊີ້ນຳຂອງພັກທີ່ວ່າ “ ເພິ່ງຕົນເອງສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ ” ເພື່ອຈະເຮັດໃຫ້ບັນຫາດັ່ງກ່າວສຳເລັດຜົນ ກ່ອນອື່ນໝົດ ແມ່ນເຮັດໃຫ້ແນວຄິດຂອງພະນັກງານ ຄູອາຈານມີຄວາມສະຫງົບ ທາງຄະນະພັກໄດ້ວາງແນວທາງເພື່ອກໍ່ສ້າງໜ່ວຍພັກໃຫ້ເປັນໜ່ວຍພັກແຂງ ຮູ້ນຳພາຮອບດ້ານ ແຜນການດັ່ງກ່າວ ໄດ້ເລີ້ມລົງມືຈັດຕັ້ງປະຕິບັດຕົ້ນປີ 1997 ຕາມທິດຊີ້ນຳຂອງຄະນະພັກກະຊວງສຶກສາທິການ ເຖິງປີ 2000 ໄດ້ມີການກວດກາການປະຕິບັດແຜນງານດັ່ງກ່າວຈາກຄະນະພັກກະຊວງສຶກສາທິການ ແລະ ໄດ້ສະຫຼຸບໃຫ້ເປັນວ່າ :

–   ໂຮງຮຽນມີຄວາມສະຫງົບ, ບໍ່ມີພະນັກງານໂຕນປະລາໜ້າທີ່ ຫຼື ຍ້າຍໄປບ່ອນອື່ນ ຊີວິດການເປັນຢູ່ຄູອາຈານພະນັກງານ ໄດ້ຮັບການແກ້ໄຂຫຼື່ນເກົ່າສະເລ່ຍແລ້ວ ແຕ່ລະເດືອນມີລາຍຮັບເພີ້ມເດືອນໜື່ງປະມານ 400,000 ກີບ ເຖິງ 600,000 ກີບ ຕໍ່ຄົນ / ຕໍ່ເດືອນ.

–   ການຮຽນການສອນໄດ້ມີການພັດທະນາຫຼັກສູດ ໃຫ້ແທດເໝາະກັບຄວາມຕ້ອງການຂອງສັງຄົມ ແລະ ເປັນທີ່ສົນໃຈຂອງສັງຄົມຫຼາຍຂື້ນ.

–   ອາຄານສະຖານທີ່ໄດ້ຮັບການບູລະນະສ້ອມແປງເປັນທີ່ໜ້າຢູ່ໜ້າຮຽນ.

–   ອຸປະກອນຮັບໃຊ້ການຮຽນການສອນໄດ້ຮັບການປັບປຸງດີຂື້ນໄປສູ່ຄຸນນະພາບໃໝ່.

–   ລະບອບວິທີເຮັດວຽກຂອງຜູ້ບໍລິຫານທຸກລະດັບໄດ້ມີແບບແຜນດີຂື້ນ ແລະ ການບໍລິຫານງານຄ່ອງຕົວກວ່າເກົ່າ.

–   ຈຳນວນສະມາຊິກພັກ ໄດ້ມີການເຕີບໃຫຍ່ຂະຫຍາຍຕົວ ແລະ ໄດ້ປະເມີນຜົນສາມາດ ຊື່ງເກີນ 80% ແມ່ນສະມາຊິກ ພັກແຂງຮູ້ນຳພາຮອບດ້ານຕາມມາດຖານ ທີ່ຄະນະຈັດຕັ້ງສູນກາງພັກວາງອອກ ແລະ ບັນດາອົງການຈັດຕັ້ງມະຫາຊົນຊາວໜຸ່ມ, ແມ່ຍິງ ແລະ ກຳມະບານໄດ້ເຄື່ອນໄຫວເປັນຂະບວນຟົດຟື້ນ.

ດ້ວຍເຫດນີ້ ວັນທີ່ 12 ເດືອນ 10 ປີ 2000 ຄະນະບໍລິຫານງານພັກ ກະຊວງສຶກສາທິການ ຈຶ່ງມອບໝາຍນາມມະຍົດໜ່ວຍພັກໂຮງຮຽນເຕັກນິກສັບພະວິຊາ ເປັນໜ່ວຍພັກແຂງຮູ້ນຳພາຮອບດ້ານ ແລະ ຖືກບັນທຶກເຂົ້າໃນປື້ມຕິດຕາມເລກທີ່ 07 ພ້ອມກັນນີ້ ກົມກອງກໍ່ໄດ້ຮັບເປັນກົມກອງດີເດັ່ນ ຂອງສະຫະພັນແມ່ຍິງ ພາຍໃຕ້ການປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງ ກະຊວງສຶກສາທິການ.

ເພື່ອຢືດໝັ້ນ ຕາມແນວທາງນະໂຍບາຍຂອງພັກ ເພື່ອນຳພາປະເທດຊາດໃຫ້ຫຼຸດພົ້ນຈາກປະເທດດ້ອຍພັດທະນາ ໂຮງຮຽນເຕັກນິກສັບພະວິຊາ ໄດ້ສືບຕໍ່ວາງແຜນຍຸດທະສາດໄລຍະຍາວ 5 ປີ 2010 -02015 ແລະ 2015 – 2020 ຂອງຕົນຂື້ນ ເພື່ອກຳນົດແນວທາງພັດທະນາໂຮງຮຽນເຕັກນິກສັບພະວິຊາຄື :

1. ຍົກລະດັບຖານະບົດບາດຂອງໂຮງຮຽນ ເປັນວິທະຍາໄລ.
2. ພັດທະນາຍົກລະດັບຫຼັກສູດຕໍ່ເນື່ອງ, ຊັ້ນກາງ, ຊັ້ນສູງ ແລະ ຫຼັກສູດ 9+3.
3. ຍົກສູງຄຸນນະພາບ ແລະ ປະລິມານໄປພ້ອມໆ ກັນ.
4. ກໍ່ສ້າງຍົກລະດັບຄູອາຈານ ລຸ້ນສືບທອດໃຫ້ມີຄຸນນະພາບ.
5. ປັບປຸງໂຄງສ້າງອາຄານເຄຫາສະຖານ ໃຫ້ເປັນທີ່ໜ້າຢູ່ ໜ້າຮຽນ.
6. ສະໜອງວັດຖຸອຸປະກອນເຕັກນິກ ຮັບໃຊ້ການຮຽນການສອນໃຫ້ທັນສະໄໝຍິ່ງຂື້ນ.

ແຜນການດັ່ງກ່າວ ໄດ້ຖືກຈັດຕັ້ງປະຕິບັດຢ່າງເປັນຮູບປະທຳເຖິງສົກຮຽນ 2010 – 2015 ທຸກຂະແໜງການໄດ້ເປີດຮັບ  ແລະ ສອນໃນຫຼັກສູດຊັ້ນກາງ ແລະ ຊັ້ນສູງ ດ້ວຍຄວາມຂະຫຍັນຂັນແຂງ ຂອງຜູ້ບໍລິຫານໂຮງຮຽນ ເຊິ່ງມີ ທ່ານ ອາຈານ ພົງສະຫວັດ ອ້ວນປໍມະນີ ຜູ້ອຳນວຍການ, ທ່ານ ອາຈານ ນາງ ປະກອບແກ້ວ ໂທປະການ ເປັນຮອງ ແລະ ທ່ານ ອາຈານ ບຸນຖະ    ໜອມ ສຸລິຍະວົງ ເປັນຮອງ ພ້ອມດ້ວຍບັນດາທ່ານຫົວໜ້າພະແນກການ ແລະ ຮອງພະແນກການພ້ອມດ້ວຍຄູອາຈານ ພະນັກງານທັງໝົດ  ໄດ້ຮ່ວມການເຮັດວຽກດ້ວຍຄວາມສະໝານສາມັກຄີກັນ ຮ່ວມກັນພັດທະນາ ໂຮງຮຽນເຕັກນິກສັບພະວິຊາດ້ວຍຄວາມມຸ້ງໝັ້ນ ເປັນຈິດໜື່ງໃຈດຽວ ສາມາດຍົກລະດັບຖານະ ແລະ ບົດບາດຂອງໂຮງຮຽນຂື້ນເປັນ ວິທະຍາໄລເຕັກນິກສັບພະວິຊາ ຕາມຂໍ້ຕົກລົງຂອງທ່ານລັດຖະມົນຕີ ກະຊວງສຶກສາທິການ ສະບັບເລກທີ່ 1464/ສສ.ອສ 06 ລົງວັນທີ 01/08/2006 ຊຶ່ງເປັນວິທະຍາໄລອາຊີວະສຶກສາແຫ່ງທຳອິດ ຂອງ ສ ປ ປ ລາວ.

ວິທະຍາໄລເຕັກນິກສັບພະວິຊາ ມີພາລະກິດທີ່ວ່າ “ ຮ່ຳຮຽນດີມີຄວາມສາມາດ ພ້ອມມາລະຍາດ ອານາຄົດຈະສົດໃສ ” ຊຶ່ງຢືດໝັ້ນໃນພາລະກິດກໍ່ສ້າງ ແລະ ຝຶກຝົນຫຼໍ່ຫຼອມບຸກຄະລາກອນ ໃຫ້ມີຄຸນນະພາບ ອອກຮັບໃຊ້ສັງຄົມ ດັ່ງວິໄສທັດຂອງວິທະຍາໄລທີ່ວ່າ :

–     ວິທະຍາໄລເຕັກນິກສັບພະວິຊາ ມຸ້ງໝັ້ນທີ່ຈະກາຍເປັນ ສະຖາບັນການສຶກສາອາຊີວະສຶກສາ ທີ່ມີຄວາມກ້າວໜ້າໃນການກໍ່ສ້າງນັກວິຊາການ ທີ່ມີຄຸນນະພາບ ທັງໃນລະດັບນາຍຊ່າງເຕັກນິກຊັ້ນກາງຈົນເຖິງລະດັບນາຍຊ່າງຊັ້ນສູງ ແລະ ວິສະວະກອນໃນຫຼາກຫຼາຍວິຊາການ ໂດຍສອດຄ່ອງກັບຄວາມຮຽກຮ້ອງຕ້ອງການຕົວຈີງຂອງສັງຄົມ ແລະ ພາລະກິດສ້າງສາພັດທະນາປະເທດຊາດ.

ເພື່ອບັນລຸເປົ້າໝາຍດັ່ງກ່າວ ທາງໂຮງຮຽນໄດ້ຄົ້ນຄວ້າຫຼັກສູດການຮຽນ-ການສອນຂອງຕົນເອງຂື້ນໂດຍອີງໃສ່ມາດຕະຖານຫຼັກສູດ ຂອງກົມອາຊີວະສຶກສາ ແລະ ການສຶກສາຊັ້ນສູງ ທີ່ໄດ້ຮັບອານຸມັດຄື :

1. ຫຼັກສູດໄຟຟ້າພະລັງນໍ້າ                      11+3
2. ຫຼັກສູດໄຟຟ້າສະຖານີ ແລະ ຕາຂ່າຍ        11+2+1,5  ແລະ ຫຼັກສູດ 9+3
3. ຫຼັກສູດປຸງແຕ່ງແຮ່                           11+2+1,5  ແລະ ຫຼັກສູດ 9+3
4. ຫຼັກສູດຊອກຄົ້ນ ແລະ ສຳຫຼວດແຮ່          11+2+1,5  ແລະ ຫຼັກສູດ 9+3
5. ຫຼັກສູດວັດແທກ-ຄຸ້ມຄອງທີ່ດີນ             12+2+1,5  ແລະ ຫຼັກສູດ 9+3
6. ຫຼັກສູດ GEOIT                            12+3       ແລະ ຫຼັກສູກ 9+3
7. ຫຼັກສູດປະເມີນລາຄາຊັບສີນທີ່ດີນ           12+3

ເພື່ອຮັບປະກັນໃຫ້ການຈັດຕັ້ງປະຕິບັດວຽກງານການຮຽນ-ການສອນ ແລະ ການເຄື່ອນໄຫວອື່ນໆ ໄດ້ຮັບຜົນດີ ວິທະຍາໄລເຕັກນິກສັບພະວິຊາ ໄດ້ປະກອບກົງຈັກການຈັດຕັ້ງຂອງຕົນຕາມພາລະບົດບາດຂອງວິທະຍາໄລ ມີ 1 ສະພາທີ່ປຶກສາມີ 6 ພະແນກ ແລະ ມີ 5 ພາກວິຊາ.

1./ ສະພາທີ່ປືກສາວິທະຍາໄລ.

ປະກອບມີ ຕົວແທນຜູ້ຊົງຄຸນວຸດທິດ້ານວິຊາສະເພາະທີ່ກ່ຽວຂ້ອງຮ່ວມ :

–       ທ່ານ ດຣ ບຸນເຖິງ ເພັງທະວົງສາ ຫົວໜ້າຫ້ອງການກະຊວງພະລັງງານ ແລະ ບໍ່ແຮ່             ເປັນປະທານ

–       ທ່ານ ພົງສະຫວັດ ອ້ວນປໍມະນີ ຜູ້ອຳນວຍການວິທະຍາໄລເຕັກນິກສັບພະວິຊາ                 ເປັນຮອງປະທານ

–       ທ່ານ ດຣ ສີມອນ ພິຈິດ ຫົວໜ້າກົມບໍ່ແຮ່                                                       ເປັນຄະນະ

–       ທ່ານ ຄຳພາ ພົມມະໄກສອນ ຮອງຫົວໜ້າກົມທໍລະນີສາດ ແລະ ແຮ່ທາດ                      ເປັນຄະນະ

–       ທ່ານ ດຣ ດາວວົງ ພອນແກ້ວ ຮອງຫົວໜ້າກົມໄຟຟ້າ                                           ເປັນຄະນະ

–       ທ່ານ ຄຳຈັນ ພາຣາຍົກ ຮອງຫົວໜ້າກົມສົ່ງເສີມ ແລະ ພັດທະນາແຮງງານ                      ເປັນຄະນະ

–       ທ່ານ ກຽງສັກ ປຣັກສາດທອງ ຫົວໜ້າສູນຝຶກອົບຮົມ ລັດວິສາຫະກິດໄຟຟ້າ                   ເປັນຄະນະ

–       ທ່ານ ນາງ ສີໄຄ ສໍສີລິບຸນມາ ຮອງຫົວໜ້າກົມແຜນທີ່ແຫ່ງຊາດ                                 ເປັນຄະນະ

–       ທ່ານ ບຸນຖະໝອມ ສຸລິຍະວົງ ຮອງຜູ້ອຳນວຍການວິທະຍາໄລເຕັກນິກສັບພະວິຊາ             ເປັນຄະນະ

–       ທ່ານ ສີວັນ ພົງຈິດ ຫົວໜ້າພະແນກວິຊາການ                                                   ເປັນຄະນະ

–       ທ່ານ ຫົວໜ້າ ພະແນກຄຸ້ມຄອງບໍລິຫານ-ການເງິນ                                              ເປັນຄະນະ

–       ທ່ານ ຜູ້ຕາງໜ້າ 03 ອົງການຈັດຕັ້ງມະຫາຊົນ                                                   ເປັນຄະນະ

–       ທ່ານ ຜູ້ຕາງໜ້າ ຈາກບໍລິສັດ ເຊໂປນ ມີນີໂຣນ                                                  ເປັນຄະນະ

–       ທ່ານ ຜູ້ຕາງໜ້າ ຈາກບໍລິສັດ ພູເບ້ຍ ມາຍນິ່ງ ຈຳກັດ                                            ເປັນຄະນະ

2./ ສະພາຂອງວິທະຍາໄລເຕັກນິກສັບພະວິຊາປະກອບມີ :

–          ຜູ້ອຳນວຍການວິທະຍາໄລເຕັກນິກສັບພະວິຊາ                ເປັນປະທານ

–          ຮອງຜູ້ອຳນວຍການ ຜູ້ຮັບຜິດຊອບວຽກວິຊາການ            ເປັນຮອງປະທານ

–          ຫົວໜ້າພະແນກ ແລະ ຫົວໜ້າພາກວິຊາສະເພາະ            ເປັນກຳມະການ

–          ຫົວໜ້າພະແນກວິຊາການ                                     ເປັນເລຂານຸການ

–          ຕາງໜ້າ 3 ອົງການຈັດຕັ້ງມະຫາຊົນ ແລະ ປ້ອງກັນ          ເປັນຄະນະ

ຄະນະດັ່ງກ່າວ ຈະປະຊຸມປຶກສາຫາລືວຽກເດືອນລະເທື່ອ ນອກຈາກນີ້ຍັງປະກອບດ້ວຍບັນດາກົງຈັກເຮັດວຽກ ຂອງວິທະຍາໄລຄື :

3./ ພະແນກວິຊາການ

     ມີໜ້າທີ່ເປັນເສນາທິການ ໃຫ້ຄະນະອຳນວຍການວິທະຍາໄລ ປະສານສົມທົບກກັບ ພາກວິຊາສະເພາະ ພັດທະນາຫຼັກສູດ, ປະຕິບັດຫຼັກສູດ ແລະ ຄຸ້ມຄອງການຮຽນ-ການສອນ, ຕິດຕາມປະເມີນຜົນ, ຈັດຕັ້ງການສອບເສັງ ແລະ ຊັບຊ້ອນບັນຈຸນັກສຶກສາທຸກປະເພດ ກວດກາການສຳເລັດການສຶກສາ, ຄຸ້ມຄອງບໍລິຫານວິຊາການ, ຄຸ້ມຄອງຫ້ອງສະໝຸດ ແລະ ຈັດພີມປະກາສະນີຍະບັດ.

4./ ພະແນກຄຸ້ມຄອງບໍລິຫານ-ການເງິນ

     ວຽກການເງິນ-ບັນຊີ ວຽກພະນັກງານ, ພາຫະນະ, ວັດສະດຸກໍ່ສ້າງ ແລະ ສ້ອມແປງ ວຽກງານແຂ່ງຂັນຍ້ອງຍໍ ແລະ ປ້ອງກັນຄວາມສະຫງົບ.

5./ ພະແນກກິດຈະກຳນັກສຶກສາ :

     ມີໜ້າທີ່ຄຸ້ມຄອງລະບຽບວິໄນນັກສຶກສາ, ຊີ້ນຳ ແລະ ຄຸ້ມຄອງການເຄື່ອນໄຫວກິດຈະກຳນອກຫຼັກສູດ, ຄຸ້ມຄອງຫໍພັກ , ແນະແນວວິຊາຊີບໂຄສະນາ ແລະ ເຜີຍແຜ່ຂໍ້ມູນຂ່າວສານທີ່ກ່ຽວຂ້ອງໃຫ້ນັກສຶກສາ.

6./ ພະແນກຂໍ້ມູນຂ່າວສານ IT

     ເປັນພະແນກຈັດຕັ້ງຂື້ນໃໝ່ສອນລະບົບ IT ພູມສັນຖານ ແລະ ທົ່ວໄປ ລວມທັງເຕັກໂນໂລຊີ IT ຮຽນຈົບໄປສາມາດນຳໃຊ້ລະລົບIT ເຂົ້າໃນການອອກແບບວາງແຜນໃນວິຊາສະເພາະສາມາດເຮັດວຽກກ່ຽວກັບ ITໄດ້, ເປັນສູນລວມຂໍ້ມູນຂອງວິທະຍາໄລເຕັກນິກສັບພະວິຊາ, ຄຸ້ມຄອງສ້ອມແປງລະບົບ IT  ຫ້ອງສະໝຸດ ວຕສ ແລະ ພັດທະນາສື່ການຮຽນ-ການສອນ.

7./ ພະແນກຈັດຕັ້ງ

     ຮັບຜິດຊອບວຽກງານຄຸ້ມຄອງພະນັກງານລັດຖະກອນ, ວຽກພັກພະນັກງານ, ປ້ອງກັນ ແລະ ນະໂຍບາຍ.

8./ ພາກວິຊາສະເພາະມີ  5 ພາກວິຊາຄື : ພາກວິຊາໄຟຟ້າ, ພາກວິຊາຊອກຄົ້ນ-ສຳຫຼວດແຮ່, ພາກວິຊາຂຸດຄົ້ນ-ປຸງແຕ່ງແຮ່, ພາກວິຊາວັດແທກ-ຄຸ້ມຄອງທີ່ດີນ ແລະ ພາກວິຊາວິທະຍາສາດພື້ນຖານ.

ແຕ່ລະພາກມີໜ້າທີ່ນຳພາແນວຄິດການເມືອງພາຍໃນພາກວິຊາ

–          ພັດທະນາຫຼັກສູດ ແລະ ຈັດຕັ້ງການຮຽນ-ການສອນ

–          ຄຸ້ມຄອງໂຮງຊ່າງ, ເຄື່ອງຈັກ, ເຄື່ອງມືອຸປະກອນການສິດສອນ

–          ຂື້ນແຜນງົບປະມານ ນຳໃຊ້ພາຍໃນພາກວິຊາຂອງຕົນຮັບຜິດຊອບ

–          ຜະລິດວັດຖຸສິ່ງຂອງ, ສ້າງສີ, ປື້ມຄູ່ມື ທີ່ສາມາດນຳໃຊ້ ແລະ ຈຳໜ່າຍເປັນຜະລິດຕະພັນຮັບໃຊ້ສັງຄົມ.

–          ຂື້ນແຜນຍົກລະດັບພະນັກງານຄູອາຈານທາງດ້ານວິຊາສະເພາະໃຫ້ສູງຂື້ນເລື້ອຍໆ.

–          ສ້າງເງື່ອນໄຂອຳນວຍຄວາມສະດວກ ແລະ ຮັບປະກັນຄວາມປອດໄພຂອງນັກຮຽນ

–          ພົວພັນກັບພາຍນອກ ເພື່ອນຳເອົາວຽກຜະລິດມາຮັບໃຊ້ການຮຽນພາກປະຕິບັດ ແລະ ການຝຶກງານຂອງນັກຮຽນ

–          ຕິດຕາມ ແລະ ກວດກາການປະຕິບັດຕາຕະລາງສອນ, ການຂື້ນຫ້ອງຂອງຄູອາຈານ ທີ່ຕົນເອງຮັບຜິດຊອບ.

ຄວາມສາມາດຂອງນັກຮຽນຫຼັງຈາກຮຽນຈົບ

ວິທະຍາໄລເຕັກນິກສັບພະວິຊາ ມີຄວາມມຸ້ງໝັ້ນໃນການກໍ່ສ້າງ ນາຍຊ່າງທຸກລະດັບ ໃຫ້ມີສີມືດີຄື : ຄວາມຮູ້ໄດ້ ເວົ້າໄດ້, ເຮັດໄດ້ ແລະ ອອກແບບໄດ້ ດັ່ງລາຍລະອຽດແຕ່ລະຂະແໜງດັ່ງນີ້ :

1. ຊ່າງສຳຫຼວດວັດແທກ ແລະ ຄຸ້ມຄອງທີ່ດີນ.

–          ສາມາດເຮັດວຽກວັດແທກ-ພິສູດຫຼັກຖານ ອອກໃບຕາດີນໄດ້.

–          ສາມາດນຳໃຊ້ເຄື່ອງວັດແທກທຸກລະດັບ ແລະ ເຄື່ອງວັດແທກທັນສະໄໝ (Totalstation, GPS)

–          ສາມາດວັດແທກເພື່ອສ້າງແຜນທີ່ພູມສັນຖານ ມາດຕາສ່ວນໃຫຍ່ໄດ້, ສ້າງແຜນທີ່ ແລະ ແຜນຜັງໄດ້

–          ສາມາດນຳໃຊ້ພາບຖ່າຍທາງອາກາດເຂົ້າໃນການສ້າງແຜນທີ່ແລ້ວ ອອກແບບວາງແຜນໄດ້

2. ໄຟຟ້າສະຖານີ ແລະ ຕາຂ່າຍ

     ສາມາດເຮັດວຽກໂຮງງານໄຟຟ້ານ້ຳຕົກ, ຕາມສະຖານີໄຟຟ້າ ສາມາດຕິດຕັ້ງຕາຂ່າຍໄຟຟ້າແຮງກາງ, ແຮງສູງ, ສາມາດຕິດຕັ້ງອຸປະກອນໄຟຟ້າສະຖານີ, ເດີນໄຟໃນອາຄານ ແລະ ສ້ອມແປງອຸປະກອນໄຟຟ້າໄດ້.

3. ພາກວິຊາຊອກຄົ້ນສຳຫຼວດແຮ່

-ສາມາດສຳຫຼວດເກັບກຳຂໍ້ມູນກ່ຽວກັບແຮ່ທາດຕ່າງ ໆ ໃນໜ້າໂລກ ແລະ ພື້ນໂລກ.

-ສາມາດຈຳແນກຊະນິດຂອງຫີນ ແລະ ແຮ່ ພ້ອມທັງເອີ້ນຊື່ຂອງພວກມັນໄດ້ຢ່າງຖືກຕ້ອງ.

-ສາມາດອະທິບາຍໄດ້ຂະບວນການຕ່າງໆ ທີ່ເກີດຂື້ນເອງຕາມທຳມະຊາດທາງດ້ານທໍລະນີສາດ.

-ສາມາດກຳນົດໄດ້ກ່ຽວກັບຈຸດປະກົດຂອງແຫຼ່ງແຮ່ ແລະ ປະເມີນປະລິມານສະສົມຂອງແຫຼ່ງແຮ່ໄດ້.

-ສາມາດຂຽນບົດລາຍງານກ່ຽວກັບຈຸດປະກົດຂອງແຮ່ທາດ.

-ສາມາດປະກອບອາຊີບເຂົ້າໃນວຽກງານຕ່າງໆ ທີ່ກ່ຽວກັບທໍລະນີສາດບໍ່ແຮ່.

4. ພາກວິຊາຂຸດຄົ້ນ-ປຸງແຕ່ງແຮ່

–         ອອກແບບວາງແຜນໃນການຂຸດຄົ້ນແຮ່

–        ຮູ້ຈັກການປຸງແຕ່ງແຮ່ໃຫ້ມີຄຸນນະພາບ

–        ສາມາດເຈາະຊີລະເບີດ ແລະ ການຂຸດຄົ້ນແຮ່

–        ສາມາດເຮັດວຽກໃນໂຮງງານກ່ຽວກັບການປຸງແຕ່ງຊີມັງ ແລະ ປຸງແຕ່ງແຮ່ອື່ນໆ ໄດ້

–        ສາມາດເຮັດວຽກປຸງແຕ່ງແຮ່ດ້ວຍວິທີຕ່າງໆ ໄດ້

–        ສາມາດແຍກແຮ່ໄດ້

5. ພະແນກສ້າງຄູອາຊີວະ

     ສ້າາງຄູອາຊີວະດ້ານໄຟຟ້າ, ວັດແທກ, ບໍ່ແຮ່ ແລະ IT ເພື່ອຮັບໃຊ້ການສິດສອນຢູ່ໃນໂຮງຮຽນອາຊີວະພາກວິຊາ ດັ່ງກ່າວສາມາດເຮັດວຽກວິຊາສະເພາະໄດ້ ແລະ ເປັນຄູສອນໄດ້.

6. ນອກຈາກມໍລະສຸມທາງດ້ານວິຊາສະເພາະແລ້ວ ການສຶກສາຮ່ຳຮຽນ ຢູ່ ວິທະຍາໄລເຕັກນິກສັບະວິຊາແຫ່ງນີ້້ ຍັງເໜັ້ນໜັກດ້ານພັດທະນາສຸຂະພາບ, ເພື່ອກຽມພ້ອມອອກແຮງງານໃນພາກອຸດສາຫະກຳ ແລະ ການເຮັດວຽກໃນສະ   ໜາມ, ພັດທະນາດ້ານຄຸນສົມບັດ, ກິລິຍາມາລະຍາດມີຄວາມຮູ້ ແລະ ເຄົາລົບລະບຽບກົດໝາຍດັ່ງປັດຊະຍາຂອງວິທະຍາໄລທີ່ວ່າ :    “ ການສຶກສາດີມີຄວາມສາມາດພ້ອມມາລະຍາດອານາຄົດຈະສົດໃສ ”

ວິທະຍາໄລເຕັກນິກສັບພະວິຊາ ຍິນດີຕ້ອນຮັບ ບັນດາທ່ານທີ່ມາຢ້ຽມຢາມ ແລະສຶກສາ ຢູ່ໃນສະຖາບັນແຫ່ງນີ້ ດ້ວຍຄວາມຜາສຸກ ແລະ ຄວາມພູມໃຈ ຖານເພື່ອນມິດ ທີ່ໃຫ້ການສຶກສາແກ່ທຸກຄົນທີ່ສົນໃຈ ເພື່ອນຳເອົາຄວາມຮູ້ຄວາມສາມາດທີ່ໄດ້ຮັບຈາກຄູອາຈານໄປປະກອບສ່ວນສ້າງສາພັດທະນາປະເທດຊາດ ໃຫ້ຈະເລີນຮັ່ງມີ ເຂັ້ມແຂງ ປະເທດຊາດຮັ່ງມີ ປະຊາຊັນພົ້ນທຸກນັ້ນຄືຄວາມພູມໃຈ ຂອງຄູອາຈານພະນັກງານ ວິທະຍາໄລເຕັກນິກສັບພະວິຊາ.