ໝວດທີ 1
ວ່າດ້ວຍນັກສຶກສາວິທະຍາໄລເຕັກນິກສັບພະວິຊາ
- ມາດຕາ 1 : ນັກສຶກສາວິທະຍາໄລເຕັກນິກສັບພະວິຊາ ແມ່ນຜູ້ທີ່ໄດ້ຂຶ້ນທະບຽນຖືກຕ້ອງຕາມລະບຽບການ ທີ່ວິທະຍາໄລເຕັກນິກສັບພະວິຊາໄດ້ກໍານົດໄວ້
- ມາດຕາ 2 : ເງື່ອນໄຂຜູ້ທີ່ຈະເປັນນັກສຶກສາວິທະຍາໄລເຕັກນິກສັບພະວິຊາ
- ຕ້ອງມີລະດັບວັດທະນາທໍາຈົບ ມໍ7, ມ4 ຫຼື ທຽບເທົ່າ ຖ້າແມ່ນພະນັກງານມາຮຽນຕໍ່ ຕ້ອງ ແມ່ນຈົບໂຮງຮຽນ ວິຊາສະເພາະຊັ້ນກາງ, ຂະແໜງວິຊາດຽວກັນກັບຂະແໜງທີ່ຈະຮຽນຕໍ່ ລະດັບຊັ້ນສູງຕໍ່ເນື່ອງ ທີ່ ວິທະຍາໄລເຕັກນິກສັບພະວິຊາ.
- ມີສຸຂະພາບສົມບູນ, ແຂງແຮງ, ບໍ່ເປັນພະຍາດຕິດແປດຮ້າຍແຮງ.
- ມີຄຸນສົບບັດດີ, ບໍ່ມີປະຫວັດການເຄື່ອນໄຫວທີ່ບໍ່ດີໃນເວລາຮຽນສາມັນ ຫຼື ເວລາປະຕິບັດງານໃນກົມກອງທ້ອງຖິ່ນກ່ອນທີ່ຈະມາຮຽນ.
- ມາດຕາ3: ນັກສຶກສາຂອງວິທະຍາໄລເຕັກນິກສັບພະວິຊາ ທຸກຄົນ ຕ້ອງໄດ້ລົງທະບຽນເຂົ້າເປັນນັກສຶກສາ ແລະ ມີເລກລະຫັດປະຈໍາຕົວ ຊຶ່ງແມ່ນຫ້ອງການຄຸ້ມຄອງນັກສຶກສາເປັນບ່ອນອອກໃຫ້ ຕາມລະບຽບສະເພາະ.
- ມາດຕາ4: ນັກສຶກສາ ຂອງວິທະຍາໄລເຕັກນິກສັບພະວິຊາ ທຸກຄົນ ຕ້ອງມີບັດນັກສຶກສາ ເພື່ອນໍາໃຊ້ສໍາລັບການເຄື່ອນໄຫວສຶກສາຮໍ່າຮຽນ ແລະ ກິດຈະກໍາຕ່າງໆ ສະເພາະໃນ ວິທະຍາໄລເຕັກນິກສັບພະວິຊາ ເທົ່ານັ້ນ ໂດຍແມ່ນ ທ່ານຜູ້ອໍານວຍການ ຈະເປັນຄົນເຊັນຮັບຮອງບັດສໍາລັບນັກສຶກສາທູກຄົນ.
ໝວດທີ 2
ວ່າດ້ວຍພັນທະ ແລະ ສິດຂອງນັກສຶກສາວິທະຍາໄລເຕັກນິກສັບພະວິຊາ
- ມາດຕາ 5 : ນັກສຶກສາວິທະຍາໄລເຕັກນິກສັບພະວິຊາທຸກຄົນມີສິດ :
- ຊົມໃຊ້ຫ້ອງສະໝຸດ, ຫ້ອງທົດລອງ, ໂຮງຊ່າງ, ອຸປະກອນເຄື່ອງມື ແລະອື່ນໆຂອງນັກສຶກສາວິທະຍາໄລເຕັກນິກສັບພະວິຊາຕາມລະບຽບການສະເພາະ
- ຊົມໃຊ້ວັດຖຸສັບສິນ ແລະອຸປະກອນຕ່າງໆຂອງນັກສຶກສາວິທະຍາໄລເຕັກນິກສັບພະວິຊາຕາມລະບຽບການສະເພາະ
- ເຂົ້ານອນຫໍພັກຂອງວິທະຍາໄລຕາມການອະນຸມັດ ແລະປະຕິບັດຕາມລະບຽບຫໍພັກ
- ເຂົ້າຮ່ວມການເຄື່ອນໄຫວທຸກຢ່າງທີ່ວິທະຍາໄລເຕັກນິກສັບພະວິຊາຈັດຂຶ້ນ ແລະກ່ຽວຂ້ອງກັບຕົນ
- ມີສິດໄດ້ຮັບການປົກປ້ອງຈາກການຈັດຕັ້ງຕ່າງໆຂອງວິທະຍາໄລເຕັກນິກສັບພະວິຊາ ໃນເມື່ອຖືກກ່າວຫາ ແລະຖືກທໍາລາຍໃນປະເດັນທີ່ກ່ຽວຂ້ອງກັບວິທະຍາໄລເຕັກນິກສັບພະວິຊາ
- ສະເໜີຄໍາຄິດເຫັນຕໍ່ບັນຫາຕ່າງໆ ຂອງວິທະຍາໄລເຕັກນິກສັບພະວິຊາທີ່ກ່ຽວຂ້ອງກັບຕົນ ມີສິດອຸທອນເມື່ອເຂົ້າໃຈວ່າຕົນເອງຖືກກ່າວຫາ, ມີສິດຍື່ນຄໍາຟ້ອງຮ້ອງຕໍ່ໜ່ວຍງານຕ່າງໆ, ຄະນະອໍານວຍການ ຕາມຂັ້ນຕອນທີ່ຈະກໍານົດໄວ້ສະເພາະ.
- ໄດ້ຮັບໄຊຍະບັດຕາມລະດັບຊັ້ນ ແລະ ຂະແໜງການຮຽນຂອງຕົນ ໃນວິທະຍາໄລເຕັກນິກສັບພະວິຊາ ຕາມລະບຽບການປະເມີນຜົນການຮຽນຂອງວິທະຍາໄລ.
- ມາດຕາ 6 : ນັກສຶກສາວິທະຍາໄລເຕັກນິກສັບພະວິຊາ ທຸກຄົນມີພັນທະຄື:
- ປະຕິບັດຕາມກົດລະບຽບ, ຂໍ້ກໍານົດ, ມາດຕະຖານ, ປະກາດແຈ້ງການຕ່າງໆທີ່ກ່ຽວກັບຕົນເອງ (ນອກຈາກມີການຍົກເວັ້ນໃນກໍລະນີໃດໜຶ່ງ ຊຶ່ງມີແຕ່ອົງການຈັດຕັ້ງທີ່ກ່ຽວຂ້ອງ ຂອງວິທະຍາໄລເຕັກນິກສັບພະວິຊາ ເທົ່ານັ້ນຈິ່ງມີສິດອະນຸ ມັດການຍົກເວັ້ນດັ່ງກ່າວ )
- ເສ່ຍຄ່າທໍານຽມ, ຄ່າລົງທະບຽນຕ່າງໆທີ່ ວິທະຍາໄລເຕັກນິກສັບພະວິຊາ ກໍານົດອອກ ແລະ ທັນກັບເວລາ.
- ປະຕິບັດການອອກແຮງງານ, ອະນາໄມ, ການເຄື່ອນໄຫວກິດຈະກໍາຕ່າງໆ ທີ່ວິທະຍາໄລເຕັກນິກສັບພະວິຊາຈັດຕັ້ງ ແລະມອບໝາຍໃຫ້.
- ປະກອບສ່ວນທາງດ້ານສະຕິປັນຍາ, ເຫື່ອແຮງ ແລະ ຊັບສິນຕາມຄວາມສາມາດຂອງຕົນ ໃນການປົກປັກຮັກສາ ແລະພັດທະນາ ວິທະຍາໄລເຕັກນິກສັບພະວິຊາ, ຂະແໜງວິຊາສະເພາະຂອງຕົນ ພ້ອມທັງປະພຶດຕົນໃຫ້ດີ ເພື່ອປະກອບສ່ວນຮັກສາຊື່ສຽງ ຂອງວິທະຍາໄລເຕັກນິກສັບພະວິຊາ ແລະ ຂະແໜງວິຊາສະເພາະຂອງຕົນ.
- ມາດຕາ 7 : ການອະນຸໂລມຕ່າງໆ (ຖ້າມີ ) ຕໍ່ນັກສຶກສາວິທະຍາໄລເຕັກນິກສັບພະວິຊາ, ນອກຈາກເງື່ອນໄຂຕ່າງໆ ທີ່ໄດ້ກໍານົດໄວ້ໃນນະໂຍບາຍລວມຂອງພັກ ແລະ ລັດຈະໄດ້ອິງໃສ່ຄຸນສົມບັດ ແລະ ຜົນງານຂອງຜູ້ກ່ຽວທີ່ປະກອບສ່ວນວຽກງານໃນວິທະຍາໄລເຕັກນິກສັບພະວິຊາ ເປັນມາດຖານ ເພື່ອພິຈາລະນາ.
ໝວດທີ 3
ວ່າດ້ວຍມາລະຍາດຂອງນັກສຶກສາວິທະຍາໄລເຕັກນິກສັບພະວິຊາ
- ມາດຕາ8: ນັກສຶກສາ ຂອງວິທະຍາໄລເຕັກນິກສັບພະວິຊາ ທຸກຄົນຕ້ອງສະແດງຄວາມເຄົາລົບ, ນັບຖືພະນັກງານ ຄູອາຈານ ທຸກຄົນ ແລະ ປະພຶດຕົນເປັນຄົນສຸພາບຮຽບຮ້ອຍ, ຖະໜອມຖ່ອມຕົນ ໃນການພົວພັນຊຶ່ງກັນ ແລະ ກັນ.
- ມາດຕາ9: ນັກສຶກສາຂອງວິທະຍາໄລເຕັກນິກສັບພະວິຊາ ທຸກຄົນຕ້ອງຮູ້ຈັກປົກປັກຮັກສາທໍາມະຊາດ ແລະ ສິ່ງແວດລ້ອມປົກປັກຮັກສາສິ່ງຂອງສ່ວນລວມ, ຮັກສາຄວາມສະອາດຈົບງາມຫ້ອງຮຽນ, ສະຖານທີ່ສາທາລະ ນະຊົນຕ່າງໆພາຍໃນວິທະຍາເຂດຂອງຕົນ.
- ມາດຕາ10: ນັກສຶກສາຂອງ ວິທະຍາໄລເຕັກນິກສັບພະວິຊາ ທຸກຄົນຕ້ອງປະພຶດຕົນເອງໃຫ້ເປັນພົນລະເມືອງດີ, ຮູ້ເຄົາລົບກົດໝາຍ, ຮັກສາຮີດຄອງປະເພນີອັນດີງາມຂອງຊາດ, ຮູ້ຊົມໃຊ້ ແລະ ເສີມຂະຫຍາຍສິລະປະວັດທະນາທໍາຂອງຊາດລາວ,ຮູ້ຮັກສາມູນເຊື້ອຄວາມສາມັກຄີລະຫວ່າງຊົນເຜົ່າ,ບໍ່ຈໍາແນກຖານະເຂດແຄ້ນແລະເຜົ່າຊົນ.
- ມາດຕາ11: ໃນວິທະຍາໄລເຕັກນິກສັບພະວິຊາ ແລະ ໃນພິທີທາງການຕ່າງໆນັກສຶກສາຂອງ ວິທະຍາໄລເຕັກນິກສັບພະວິຊາ ທຸກຄົນຕ້ອງນຸ່ງເຄື່ອງແບບຂອງນັກສຶກສາ, ລັກສະນະເຄື່ອງແບບຂອງນັກສຶກສາ ວິທະຍາໄລເຕັກນິກສັບພະວິຊາ ມີຄື :
- ສໍາລັບນັກສຶກສາຍິງ :
- ນຸ່ງສິ້ນມີຕີນກ້ວາງບໍ່ເກີນ 30 ຊມ, ບໍ່ລ່າມ ແລະ ເຂີນເກີນຄວນ, ສີອິງຕາມການກໍານົດຂອງວິທະຍາໄລ.
- ເສື້ອຂາວ ແຂນຍາວ ຫຼື ແຂນສັ້ນມີກາໝາຍຂອງ ວິທະຍາໄລເຕັກນິກສັບພະວິຊາ ຢູ່ກົກແຂນຊ້າຍ.
- ເກີບ ສີດໍາ ຫຼື ສີນໍ້າຕານ ( ເກີບຄັດຊູ, ເກີບສຸບ ຫຼື ເກີບຜ້າໃບ )
- ສາຍແອວໂລຫະແບບແມ່ຍິງລາວ ຫຼື ໜັງສີດໍາກ້ວາງບໍ່ເກີນ 3 ຊມ, ຫົວສາຍແອວບໍ່ມີລວດລາຍເກີນຄວນ.
- ສໍາລັບນັກສຶກສາຊາຍ :
- ໂສ້ງຂາຍາວ, ຕັດດ້ວຍແພດໍາທໍາມະດາ, ປາຍຂາໂສ້ງກ້ວາງລະຫວ່າງ 20 – 25 ຊມ.
- ເສື້ອຂາວແຂນຍາວ ຫຼື ແຂນສັ້ນມີກາໝາຍຂອງ ວິທະຍາໄລເຕັກນິກສັບພະວິຊາ ຢູ່ກົກແຂນຊ້າຍ.
- ເກີບໜັງ ຫຼື ເກີບບັງຕຸບ, ສີດໍາ, ສີຂາວ ຫຼື ສີນໍ້າຕານ.
- ສາຍແອວໜັງສີດໍາກ້ວາງບໍ່ເກີນ 3 ຊມ, ຫົວສາຍແອວບໍ່ມີລວດລາຍເກີນຄວນ.
- ສໍາລັບຊົງຜົມ
- ນັກສຶກສາຍິງໃຫ້ໄວ້ຜົມເປັນຊົງສຸພາບຮຽບຮ້ອຍແບບມູນເຊື້ອແມ່ຍິງລາວ.
- ນັກສຶກສາຊາຍໃຫ້ຕັດຜົມສັ້ນພໍດີ ແລະ ສະອາດຈົບງາມ (ເປີດ, ແມັກ ຫຼື ຈອນບາງ ).
- ມາດຕາ12: ນັກສຶກສາຂອງ ວິທະຍາໄລເຕັກນິສັບພະວິຊາ ທຸກຄົນຕ້ອງປະຕິບັດຕົນເປັນນັກສຶກສາທີ່ດີໃນຫ້ອງຮຽນ, ເວລາອາຈານ ເຂົ້າຫ້ອງຊົ່ວໂມງທໍາອິດ ຕ້ອງລຸກຂຶ້ນທໍາຄວາມເຄົາລົບ, ຕ້ອງເຂົ້າຫ້ອງຮຽນກ່ອນອາຈານສະເໝີກ່ອນຈະອອກ – ເຂົ້າຫ້ອງຮຽນ ຫຼື ຖາມຕອບໃນຫ້ອງຮຽນ ຕ້ອງຍົກມືຂໍ ແລະ ໄດ້ຮັບອະນຸຍາດຈາກອາຈານ, ໃນຫ້ອງຮຽນຕ້ອງຕັ້ງໃຈຮຽນ ແລະ ບໍ່ວົນແຊວ, ມອດດອກໄຟ, ພັດລົມ ແລະ ມ້ຽນໂຕະຕັ່ງທຸກຄັ້ງກ່ອນຈະເລີກຮຽນ.
- ມາດຕາ13: ຂໍ້ຫ້າມສໍາລັບນັກສຶກສາວິທະຍາໄລເຕັກນິກສັບພະວິຊາ.
- ຫ້າມນັກສຶກສາ ຂາດຮຽນໂດຍບໍ່ໄດ້ຮັບອະນຸຍາດ.
- ຫ້າມນັກສຶກສາ ທໍາການທຸຈະລິດໃນການຮຽນ ແລະ ການສອບເສັງ.
- ຫ້າມນັກສຶກສາ ທໍາລາຍ ແລະ ປອມແປງເອກະສານຕ່າງໆ ຂອງທາງລັດຖະການ.
- ຫ້າມນັກສຶກສາ ທໍາລາຍຊັບສົມບັດຂອງສ່ວນລວມ ຫຼື ຂອງບຸກຄົນອື່ນ.
- ຫ້າມນັກສຶກສາ ສ້າງຄວາມແຕກແຍກ ແລະ ປັ່ນປ່ວນກໍ່ໃຫ້ເກີດຄວາມບໍ່ສະຫງົບ.
- ຫ້າມນັກສຶກສາ ສ້າງກຸ່ມກ້ອນຕ່າງໆ ຫຼື ຈັດຕັ້ງອົງການໂຮມຊຸມນຸມໄດໜຶ່ງຂຶ້ນ ໂດຍບໍ່ໄດ້ຮັບອະນຸຍາດ.
- ຫ້າມນັກສຶກສາ ລັກໂລບເອົາຂອງສ່ວນລວມ ຫຼື ຂອງຜູ້ອື່ນມາເປັນຂອງສ່ວນຕົວ.
- ຫ້າມນັກສຶກສາ ຍົກຍ້າຍຂອງສ່ວນລວມ ໂດຍບໍ່ໄດ້ຮັບອະນຸຍາດ.
- ຫ້າມນັກສຶກສາ ນໍາເອົາອາວຸດທຸກປະເພດເຂົ້າມາໃນວິທະຍາໄລເຕັກນິກສັບພະວິຊາ ໂດຍບໍ່ໄດ້ຮັບອະນຸຍາດ
- ຫ້າມນັກສຶກສາ ເສບຢາເສບຕິດ ແລະ ມີໄວ້ໃນຄອບຄອງຢາເສບຕິດທຸກປະເພດ.
- ຫ້າມນັກສຶກສາ ຊາຍ – ຍິງ ພົວພັນແບບຜິດຮີດຄອງປະເພນີ.
- ຫ້າມນັກສຶກສາ ນໍາໃຊ້ຫຼືມີໄວ້ຄອບຄອງແຜ່ນຊີດີ ຫຼື ຮູບພາບລາມົກທຸກຊະນິດ.
- ຫ້າມນັກສຶກສາ ນໍາໃຊ້ສະຖານທີ່ ວິທະຍາໄລເຕັກນິກສັບພະວິຊາ ເປັນບ່ອນມົ້ວສຸມຫຼີ້ນກິນ ເຮຮາຕ່າງໆ.
- ຫ້າມນັກສຶກສາ ໃສ່ເກີບແຕະ ມາຂຶ້ນຫ້ອງຮຽນ ຫຼື ຮ່ວມກອງປະຊຸມທາງລັດທະການຕ່າງໆ.
- ຫ້າມນັກສຶກສາ ຕີກັນຫຼືຍຸຍົງສົ່ງເສີມທີ່ກໍ່ໃຫ້ເກີດຄວາມບໍ່ສະຫງົບຢູ່ພາຍໃນວິທະຍາໄລເຕັກນິກສັບພະວິຊາ
- ຫ້າມນັກສຶກສາ ນໍາເອົາບຸກຄົນພາຍນອກ ເຂົ້າມາໃນວິທະຍາໄລເຕັກນິກສັບພະວິຊາ ໂດຍບໍ່ໄດ້ຮັບອະນຸຍາດ.
- ຫ້າມນັກສຶກສາ ຫຼິ້ນການພະນັນ ທຸກປະເພດ ຢູ່ພາຍໃນວິທະຍາໄລເຕັກນິກສັບພະວິຊາ.
- ຫ້າມນັກສຶກສາ ຫຼິ້ນກິລາທຸກປະເພດ ໃນບໍລິເວນອາຄານຮຽນ ຫຼື ເຂດຫວງຫ້າມ.
- ຫ້າມນັກສຶກສາ ດື່ມເຫຼົ້າ ຫຼື ສິ່ງມຶນເມົາທຸກປະເພດໃນ ວ.ຕ.ສ( ຍົກເວັ້ນກໍລະນີມີງານລ້ຽງ ຫຼື ງານສ້າງສັນ )
- ຫ້າມນັກສຶກສາ ຜິດຖຽງກັນ ໂດຍໃຊ້ວາຈາບໍ່ສຸພາບ.
- ຫ້າມນັກສຶກສາ ໃຊ້ວາຈາບໍ່ສຸພາບ ຕໍ່ພະນັກງານ – ຄູອາຈານ.
- ຫ້າມນັກສຶກສາ ຂາດການອອກແຮງງານ, ອານາໄມ ແລະ ເຄື່ອນໄຫວກິດຈະກໍາອື່ນໆ.
- ຫ້າມນັກສຶກສາ ເປີດເຄື່ອງໃຊ້ໄຟຟ້າໃນຫ້ອງຮຽນປະໄວ້ ໃນເວລາເລີກຮຽນ.
- ຫ້າມນັກສຶກສາ ສູບຢາ, ກິນອາຫານ ( ໃນເວລາຮຽນ, ປະຊຸມ, ເຂົ້າຫ້ອງສະໝຸດ… )
- ຫ້າມນັກສຶກສາ ເຂົ້າຫ້ອງການ ຂອງພະນັກງານ-ຄູອາຈານ ໂດຍບໍ່ໄດ້ຮັບອະນຸຍາດ.
- ຫ້າມນັກສຶກສາ ສົ່ງສຽງດັງໃນເວລາຮຽນ ຫຼື ປະຊຸມ ເຊິ່ງເປັນການລົບກວນຜູ້ອື່ນ.
- ຫ້າມນັກສຶກສາ ສໍາລະສິ່ງໂສໂຄກ ຫຼື ຖິ້ມຂີ້ເຫຍື້ອຊະຊາຍ.
- ຫ້າມນັກສຶກສາ ທໍາລາຍໜັງສື, ວາລະສານ, ແຈ້ງການຕ່າງໆ ທີ່ຕິດໄວ້ໃນຫໍຂ່າວ ຫຼື ກະດານຂ່າວຕ່າງໆ…
- ຫ້າມນັກສຶກສາ ຂີດຂຽນ ຫຼື ຕິດຮູບພາບທີ່ບໍ່ເໝາະສົມໃສ່ໜ້າໂຕະ ແລະ ບໍລິເວນຝາຫ້ອງຮຽນ.
- ຫ້າມນັກສຶກສາ ປີນຮົ້ວ ຫຼື ກໍາແພງ ວິທະຍາໄລເຕັກນິກສັບພະວິຊາ ຢ່າງເດັດຂາດ.
- ຫ້າມນັກສຶກສາ ນໍາລົດຈັກ, ລົດຖີບ ເຂົ້າໄປຈອດໃນກ້ອງອາຄານຮຽນ, ກ້ອງຫໍພັກ, ກ້ອງຮົ່ມໄມ້ ຫຼື ບໍລິເວນຕ່າງໆທີ່ຫວງຫ້າມ.
ໝວດທີ 4
ວ່າດ້ວຍການຄວບຄຸມການປະພຶດຂອງນັກສຶກສາ.
- ມາດຕາ14: ວິທະຍາໄລເຕັກນິກສັບພະວິຊາຄວບຄຸມການປະພຶດຂອງນັກສຶກສາດ້ວຍວິທີການຕັດຄະແນນການປະພຶດຄື: ໃນສົກຮຽນໜຶ່ງນັກສຶກສາທຸກຄົນຈະມີຄະແນນການປະພຶດ 300 ຄະແນນ ໃນເມື່ອນັກສຶກສາມີການກະທໍາຜິດຄຽງຄູ່ກັບການສຶກສາອົບລົມ ແລ້ວຍັງຕ້ອງຖືກຕັດຄະແນນຄວາມປະພຶດຕາມຕາຕະລາງລຸ່ມນີ້ :
ຕາຕະລາງ 1 :ປະເພດຄວາມຜິດ ແລະຄະແນນທີຖືກຕັດ
| ລ/ດ | ປະເພດການກະທໍາຜິດ | ຄະແນນທີ່ຖືກຕັດ/ຄັ້ງ/ຄົນ | ໝາຍເຫດ |
| 1 | ຈັດຕັ້ງອົງການໃດໜຶ່ງຂຶ້ນໂດຍບໍ່ໄດ້ຮັບອະນຸຍາດ | 300 | |
| 2 | ຈັດຕັ້ງໂຮມຊຸມນຸມໃດໜຶ່ງຂຶ້ນໂດຍບໍ່ໄດ້ຮັບອະນຸຍາດ | 300 | |
| 3 | ເສບ ຫຼື ມີຢາເສບຕິດໄວ້ຄອບຄອງ(ປະເພດທາງການຫວງຫ້າມ) | 300 | |
| 4 | ນໍາເອົາອາວຸດສົງຄາມ ເຂົ້າມາ ວິທະຍາໄລເຕັກນິກສັບພະວິຊາ | 300 | |
| 5 | ເອົາຄົນບໍ່ດີ ( ປະເພດໂຕນຄຸກຜູ້ທີ່ເຈົ້າໜ້າທີພວມຈັບ ) ເຂົ້າມາໃນ ວິທະຍາໄລເຕັກນິກສັບພະວິຊາ | 300 | |
| 6 | ເອົາຄົນບໍ່ດີ ( ປະເພດໂສເພນີ , ຄົນເສບຢາເສບຕິດ , ຄົນເກເລ ) ເຂົ້າມາໃນ ວິທະຍາໄລເຕັກນິກສັບພະວິຊາ | 300 | |
| 7 | ປອມແປງລາຍເຊັນ ຫຼື ທໍາລາຍເອກະສານ ທາງລັດຖະການ | 200-300 | |
| 8 | ຕີກັນ ຫຼື ຍຸໂຍງສົ່ງເສີມກໍ່ໃຫ້ເກີດຄວາມບໍ່ສະຫງົບ ຢູ່ ວ.ຕ.ສ | 150-300 | |
| 9 | ເມົາເຫຼົ້າ ແລ້ວອາລະວາດວຸ້ນວາຍ | 50-150 | |
| 10 | ສໍ້ໂກງຫຼືລັກ ມູນຄ່າແຕ່ 10,001 ກີບຂຶ້ນໄປ | 200-300 | |
| 11 | ສໍ້ໂກງຫຼືລັກມູນຄ່າຕໍ່າກ່ວາ 10,000 ກີບ | 100-200 | |
| 12 | ທໍາລາຍຊັບສົມບັດສ່ວມລວມມູນຄ່າແຕ່ 10,001 ກີບຂຶ້ນໄປໂດຍບໍ່ເຈດຕະນາ | 80-150 | |
| 13 | ທໍາລາຍຊັບສົມບັດສ່ວມລວມມູນຄ່າຕໍ່າກ່ວາ 10,000 ກີບ ໂດຍບໍ່ເຈດຕະນາ | 20-80 | |
| 14 | ທໍາລາຍຊັບສົມບັດສ່ວນລວມ ( ບໍ່ກໍານົດມູນຄ່າ ) ໂດຍບໍ່ເຈດຕະນາ | 150-300 | |
| 15 | ຫຼີ້ນການພະນັນໃນຂອບເຂດວິທະຍາໄລເຕັກນິກສັບພະວິຊາ | 100-300 | |
| 16 | ທໍາການເປິເປື້ອນບໍລິເວນ ວິທະຍາໄລເຕັກນິກສັບພະວິຊາ | 60-150 | |
| 17 | ຜິດຖຽງກັນໂດຍໃຊ້ວາຈາບໍ່ສຸພາບ | 40-80 | |
| 18 | ບໍ່ປະຕິບັດຄໍາສັ່ງຫຼື ໃຊ້ວາຈາບໍ່ສຸພາບຕໍ່ພະນັກງານ – ຄູອາຈານ | 60-120 | |
| 19 | ບໍ່ເຂົ້າຮ່ວມການອອກແຮງງານ , ອະນາໄມ ແລະ ເຄື່ອນໄຫວກິດຈະກໍາອື່ນໆ | 50-100 | |
| 20 | ຂາດຮຽນ ຫຼື ຂາດປະຊຸມ | 20-40 | |
| 21 | ທໍາການທຸຈະຫຼິດໃນການຮຽນ ແລະ ການສອບເສັງ | 50-100 | |
| 22 | ບໍ່ປິດໄຟ, ພັດລົມ, ແອ ໃນເວລາເລີກຮຽນ | 20-40 | |
| 23 | ນຸ່ງເຄື່ອງບໍ່ຖືກລະບຽບຂອງນັກສຶກສາ ວິທະຍາໄລເຕັກນິກສັບພະວິຊາ. | 20-80 | |
| 24 | ນັກສຶກສາ ຊາຍ-ຍິງ ພົວພັນເພດແບບຜິດຮີດຄອງປະເພນີ | 100-300 | |
| 25 | ນໍາໃຊ້ຫຼືມີໄວ້ໃນຄອບຄອງແຜ່ນຊີດີ, ຮູບພາບລາມົກທຸກຊະນິດ | 40 | |
| 26 | ຫຼິ້ນກິລາໃນເຂດຫວງຫ້າມ | 40 | |
| 27 | ນໍາໃຊ້ສະຖານທີ່ ວິທະຍາໄລເຕັກນິກສັບພະວິຊາ ເປັນບ່ອນມົ້ວສຸມ ຫຼິ້ນກິນເຮຮາ | 40-100 | |
| 28 | ນັກສຶກສາໃສ່ເກີບແຕະ ມາຂຶ້ນຫ້ອງຮຽນຫຼືຮ່ວມກອງປະຊຸມທາງລັດທະການຕ່າງໆ. | 20 | |
| 29 | ທໍາລາຍໜັງສືວາລະສານ, ແຈ້ງການຕ່າງໆ ທີ່ຕິດໄວ້ໃນຫໍຂ່າວ | 50 | |
| 30 | ຂີດຂຽນ, ຕິດຮູບພາບທີ່ບໍ່ເໝາະສົມໃສ່ໜ້າໂຕະຫຼືຝາຫ້ອງຮຽນ | 50-80 | |
| 31 | ປີນຮົ້ວ ຫຼື ກໍາແພງ ວິທະຍາໄລເຕັກນິກສັບພະວິຊາ | 80 | |
| 32 | ບໍ່ສົ່ງປຶ້ມຫໍສະໝຸດ, ສົ່ງປຶ້ມຫໍສະໝຸດຊ້າ ຫຼື ເຮັດເປ່ເພເສຍຫາຍ | 40-60 | |
| 33 | ບົນແຊວໃນເວລາຮຽນ ຫຼື ເວລາເຂົ້າຮ່ວມປະຊຸມ | 20 | |
| 34 | ມາຂຶ້ນຮຽນຊ້າເກີນ 15 ນາທີ | 20 | |
| 35 | ຈອດລົດ, ຕິດຈັກລົດໃນເວລາຮຽນ ຫຼື ເຂດທີ່ຫວງຫ້າມ | 50 | |
| 36 | ສູບຢາຫຼືກິນອາຫານໃນເວລາຮຽນ, ປະຊຸມ, ເຂົ້າຫ້ອງສະໝຸດ | 60 | |
| 37 | ເຂົ້າຫ້ອງການພະນັກງານ-ຄູອາຈານ ໂດຍບໍ່ໄດ້ຮັບອະນຸຍາດ | 20 |
- ການກະທໍາຜິດທີ່ບໍ່ໄດ້ກໍານົດໄວ້ໃນຂໍ້ 1 ໃຫ້ອີງຕາມກົດລະບຽບສະເພາະ ( ຖ້າມີ ) ຫຼື ອິງຕາມຕາຕະລາງ 1 ເພື່ອພິຈາລະນາຕັດຄະແນນຄວາມປະພຶດ.
- ການຈັດປະເພດຄວາມປະພຶດ ແລະ ຜົນການຕັດສິນໃຫ້ປະຕິບັດຕາມຕາຕະລາງ.
ຕາຕະລາງ 2 : ຜົນການຕັດສິນຄະແນນຄວາມປະພຶດ
| ຄະແນນຖືກຕັດ | ຄະແນນຍັງເຫຼືອ | ຜົນການຕັດສິນ |
| 00 – 60 | 240 – 300 | ເປັນນັກສຶກສາທີ່ມີການປະພຶດດີ |
| 61 – 100 | 200 – 239 | ເປັນນັກສຶກສາທີ່ມີການປະພຶດທໍາມະດາ |
| 101 – 150 | 150 – 199 | ເປັນນັກສຶກສາທີ່ມີການປະພຶດບໍ່ເໝາະສົມໃນບາງດ້ານ ແລະ ຖືກຕັກເຕືອນເປັນລາຍລັກອັກສອນຈາກຫົວໜ້າພະແນກກິດຈະກໍານັກສຶກສາ |
| 151 – 200 | 100 – 149 | ເປັນນັກສຶກສາທີ່ມີການປະພຶດບໍ່ເໝາະສົມ, ຖືກຕັກເຕືອນເປັນລາຍລັກອັກສອນຈາກຜູ້ອໍານວຍການ ແລະ ແຈ້ງໃຫ້ຜູ້ປົກຄອງຮັບຮູ້. |
| 201 – 260 | 40 – 99 | ເປັນນັກສຶກສາທີ່ມີການປະພຶດບໍ່ດີ, ໃຫ້ຂຽນໃບສາລະພາບຄວາມຜິດໄວ້ກັບຫ້ອງການຄຸ້ມຄອງນັກສຶກສາ ແລະ ຖືກຕັດນະໂຍບາຍຕ່າງໆ ທີ່ຄວນໄດ້ຮັບທຸກຢ່າງ |
| 261 – 290 | 10 – 39 | ເປັນນັກສຶກສາທີ່ມີການປະພຶດບໍ່ດີ ແລະ ລົບລ້າງຜົນການສອບເສັງປະຈໍາພາກຮຽນຫຼືປີຮຽນ. |
| 291 – 300 | 00 – 09 | ໝົດສະພາບການເປັນນັກສຶກສາ ຂອງ ວິທະຍາໄລເຕັກນິກສັບພະວິຊາ |
ຕາຕະລາງທີ3: ການປັບໃໝ ແລະ ໃຊ້ແທນຄືນ
| ລ/ດ | ປະເພດການກະທໍາຜິດ | ຄ່າປັບໃໝ/ຄັ້ງ/ຄົນ | ໝາຍເຫດ |
| 1 | ຈັດຕັ້ງອົງການໃດໜຶ່ງຂຶ້ນໂດຍບໍ່ໄດ້ຮັບອະນຸຍາດ | 300,000 ກີບ | ໂຈະການຮຽນ |
| 2 | ຈັດຕັ້ງໂຮມຊຸມນຸມໃດໜຶ່ງຂຶ້ນໂດຍບໍ່ໄດ້ຮັບອະນຸຍາດ | 300,000 ກີບ | ໂຈະການຮຽນ |
| 3 | ເສບ ຫຼື ມີຢາເສບຕິດໄວ້ຄອບຄອງ(ປະເພດທາງການຫວງຫ້າມ) | 600,000 ກີບ | ໂຈະການຮຽນ |
| 4 | ນໍາເອົາອາວຸດສົງຄາມ ເຂົ້າມາ ວິທະຍາໄລເຕັກນິກສັບພະວິຊາ | 300,000 ກີບ | ໂຈະການຮຽນ |
| 5 | ເອົາຄົນບໍ່ດີ ( ປະເພດໂຕນຄຸກຜູ້ທີ່ເຈົ້າໜ້າທີພວມຈັບ ) ເຂົ້າມາໃນ ວ.ຕ.ສ | 500,000 ກີບ | ໂຈະການຮຽນ |
| 6 | ເອົາຄົນບໍ່ດີ ( ປະເພດໂສເພນີ, ຄົນເສບຢາເສບຕິດ, ຄົນເກເລ)ເຂົ້າມາໃນ ວຕສ | 300,000 ກີບ | ຂຽນໃບສໍາຫຼວດ |
| 7 | ປອມແປງລາຍເຊັນ ຫຼື ທໍາລາຍເອກະສານ ທາງລັດຖະການ | 50,000 ກີບ | ຂຽນໃບສໍາຫຼວດ |
| 8 | ຕີກັນ ຫຼື ຍຸໂຍງສົ່ງເສີມກໍ່ໃຫ້ເກີດຄວາມບໍ່ສະຫງົບ ຢູ່ ວ.ຕ.ສ | 300,000 ກີບ | ໂຈະການຮຽນ |
| 9 | ເມົາເຫຼົ້າ ແລ້ວອາລະວາດວຸ້ນວາຍ | 500,000 ກີບ | ໂຈະການຮຽນ |
| 10 | ສໍ້ໂກງຫຼືລັກ ມູນຄ່າແຕ່ 10,001 ກີບຂຶ້ນໄປ | 100,000 ກີບ | ຂຽນໃບສໍາຫຼວດ |
| 11 | ສໍ້ໂກງຫຼືລັກມູນຄ່າຕໍ່າກ່ວາ 10,000 ກີບ | 50,000 ກີບ | ຂຽນໃບສໍາຫຼວດ |
| 12 | ທໍາລາຍຊັບສົມບັດສ່ວມລວມມູນຄ່າແຕ່ 10,001 ກີບຂຶ້ນໄປໂດຍບໍ່ເຈດຕະນາ | 150,000 ກີບ | ຂຽນໃບສໍາຫຼວດ |
| 13 | ທໍາລາຍຊັບສົມບັດສ່ວມລວມມູນຄ່າຕໍ່າກ່ວາ 10,000 ກີບ ໂດຍບໍ່ເຈດຕະນາ | 100,000 ກີບ | ຂຽນໃບສໍາຫຼວດ |
| 14 | ທໍາລາຍຊັບສົມບັດສ່ວນລວມ ( ບໍ່ກໍານົດມູນຄ່າ ) ໂດຍບໍ່ເຈດຕະນາ | 50,000 ກີບ | |
| 15 | ຫຼີ້ນການພະນັນໃນຂອບເຂດວິທະຍາໄລເຕັກນິກສັບພະວິຊາ | 100,000 ກີບ | ຂຽນໃບສໍາຫຼວດ |
| 16 | ທໍາການເປິເປື້ອນບໍລິເວນ ວິທະຍາໄລເຕັກນິກສັບພະວິຊາ | 20,000 ກີບ | ຂຽນໃບສໍາຫຼວດ |
| 17 | ຜິດຖຽງກັນໂດຍໃຊ້ວາຈາບໍ່ສຸພາບ | 150,000 ກີບ | ຂຽນໃບສໍາຫຼວດ |
| 18 | ບໍ່ປະຕິບັດຄໍາສັ່ງຫຼື ໃຊ້ວາຈາບໍ່ສຸພາບຕໍ່ພະນັກງານ – ຄູອາຈານ | ຂຽນໃບສໍາຫຼວດ | |
| 19 | ບໍ່ເຂົ້າຮ່ວມການອອກແຮງງານ , ອະນາໄມ ແລະ ເຄື່ອນໄຫວກິດຈະກໍາອື່ນໆ | ຂຽນໃບສໍາຫຼວດ | |
| 20 | ຂາດຮຽນ ຫຼື ຂາດປະຊຸມ | ຂຽນໃບສໍາຫຼວດ | |
| 21 | ທໍາການທຸຈະຫຼິດໃນການຮຽນ ແລະ ການສອບເສັງ | ຂຽນໃບສໍາຫຼວດ | |
| 22 | ບໍ່ປິດໄຟ, ພັດລົມ, ແອ ໃນເວລາເລີກຮຽນ | ຂຽນໃບສໍາຫຼວດ | ຜູ້ທີ່ຖືກມອບໝາຍ |
| 23 | ນຸ່ງເຄື່ອງບໍ່ຖືກລະບຽບຂອງນັກສຶກສາ ວິທະຍາໄລເຕັກນິກສັບພະວິຊາ. | ຂຽນໃບສໍາຫຼວດ | |
| 24 | ນັກສຶກສາ ຊາຍ-ຍິງ ພົວພັນເພດແບບຜິດຮີດຄອງປະເພນີ | 300,000 ກີບ | ໂຈະການຮຽນ |
| 25 | ນໍາໃຊ້ຫຼືມີໄວ້ໃນຄອບຄອງແຜ່ນຊີດີ, ຮູບພາບລາມົກທຸກຊະນິດ | 20,000 ກີບ | ຂຽນໃບສໍາຫຼວດ |
| 26 | ຫຼິ້ນກິລາໃນເຂດຫວງຫ້າມ | ຂຽນໃບສໍາຫຼວດ | |
| 27 | ນໍາໃຊ້ສະຖານທີ່ວິທະຍາໄລເຕັກນິກສັບພະວິຊາເປັນບ່ອນມົ້ວສຸມຫຼິ້ນກິນເຮຮາ | 500,000 ກີບ | ໂຈະການຮຽນ |
| 28 | ນັກສຶກສາໃສ່ເກີບແຕະ ມາຂຶ້ນຫ້ອງຮຽນຫຼືຮ່ວມກອງປະຊຸມທາງລັດທະການ | ຂຽນໃບສໍາຫຼວດ | |
| 29 | ທໍາລາຍໜັງສືວາລະສານ, ແຈ້ງການຕ່າງໆ ທີ່ຕິດໄວ້ໃນຫໍຂ່າວ | ຂຽນໃບສໍາຫຼວດ | |
| 30 | ຂີດຂຽນ, ຕິດຮູບພາບທີ່ບໍ່ເໝາະສົມໃສ່ໜ້າໂຕະຫຼືຝາຫ້ອງຮຽນ | ຂຽນໃບສໍາຫຼວດ | |
| 31 | ປີນຮົ້ວ ຫຼື ກໍາແພງ ວິທະຍາໄລເຕັກນິກສັບພະວິຊາ | 50,000 ກີບ | ຂຽນໃບສໍາຫຼວດ |
| 32 | ບໍ່ສົ່ງປຶ້ມຫໍສະໝຸດ, ສົ່ງປຶ້ມຫໍສະໝຸດຊ້າ ຫຼື ເຮັດເປ່ເພເສຍຫາຍ | 50,000 ກີບ | ຂຽນໃບສໍາຫຼວດ |
| 33 | ບົນແຊວໃນເວລາຮຽນ ຫຼື ເວລາເຂົ້າຮ່ວມປະຊຸມ | ຂຽນໃບສໍາຫຼວດ | |
| 34 | ມາຂຶ້ນຮຽນຊ້າເກີນ 15 ນາທີ | ເອົາບັດເຂົ້າຫ້ອງ | |
| 35 | ຈອດລົດ, ຕິດຈັກລົດໃນເວລາຮຽນ ຫຼື ເຂດທີ່ຫວງຫ້າມ | 120,000 ກີບ | ຂຽນໃບສໍາຫຼວດ |
| 36 | ສູບຢາຫຼືກິນອາຫານໃນເວລາຮຽນ, ປະຊຸມ, ເຂົ້າຫ້ອງສະໝຸດ | ຂຽນໃບສໍາຫຼວດ | |
| 37 | ເຂົ້າຫ້ອງການພະນັກງານ-ຄູອາຈານ ໂດຍບໍ່ໄດ້ຮັບອະນຸຍາດ | ຂຽນໃບສໍາຫຼວດ |
- ວິທີ ແລະ ຂັ້ນຕອນການຕັດຄະແນນຄວາມປະພຶດຂອງນັກສຶກສາ:
- ອາຈານສອນ, ພະນັກງານທຸກຄົນ ໃນຫ້ອງການ ແລະ ຄະນະລ້ວນແຕ່ມີສິດແນະນໍາ, ຕັກເຕືອນ ແລະ ຄວບຄຸມການປະພຶດຂອງນັກສຶກສາ ໃນຂະແໜງວິຊາສະເພາະ ຂອງຕົນ ແລະ ຕາມໜ້າທີ່ຕໍາແໜ່ງຂອງຕົນ.
- ຂັ້ນຕອນ ແລະ ການຕັດຄະແນນຄວາມປະພຶດຂອງນັກສຶກສາປະຕິບັດຄື :
- ອາຈານ, ພະນັກງານທີ່ເຫັນການກະທໍາຜິດຂອງນັກສຶກສາ, ສົ່ງຂ່າວເປັນລາຍລັກອັກສອນ ເຖິງອາຈານທີ່ປຶກສາ ຫຼືອາຈານປະຈໍາຊັ້ນຂອງນັກສຶກສາຜູ້ນັ້ນຫຼືໜ່ວຍງານກິດຈະກໍານັກສຶກສາ ຫຼືຜູ້ທີ່ຖືກມອບໝາຍພາຍໃນ 24 ຊົ່ວໂມງ.
- ໜ່ວຍງານກິດຈະກໍານັກສຶກສາຫຼືຜູ້ທີ່ຖືກມອບໝາຍ ເປັນຜູ້ບັນທຶກຄວາມຜິດນັກສຶກສາໄວ້ ແລະ ແຈ້ງຜົນການຕັດຄະແນນການປະພຶດໃຫ້ນັກສຶກສາຜູ້ນັນຊາບພາຍໃນ 48 ຊົ່ວໂມງ.
- ທ້າຍພາກຮຽນໜ່ວຍງານກິດຈະກໍານັກສຶກສາສົມທົບກັບອາຈານທີ່ປຶກສາ ຫຼືອາຈານປະຈໍາຊັ້ນ ເປັນຜູ້ສະຫຼູບຄະແນນການປະພຶດນັກສືກສາ ເພື່ອຂໍລາຍເຊັນຢັ້ງຢືນຈາກຫ້ອງການຄຸ້ມຄອງນັກສຶກສາ ແລະ ແຈ້ງໃຫ້ທ່ານຜູ້ອໍານວຍການຊາບກ່ອນການສອບເສັງພາກຮຽນ.
ໝາຍເຫດ :
- ນັກສຶກສາມີສິດທວງຖາມຜົນການຕັດຄະແນນການປະພຶດຂອງຕົນພາຍໃນ 72 ຊົ່ວໂມງພາຍຫຼັງຮັບຊາບຜົນ ໃນກໍລະນີມີນັກສຶກສາທວງຖາມໃຫ້ປະຕິບັດຄື :
- ຖ້າແມ່ນການກະທໍາຜິດລະດັບຫ້ອງການຄຸ້ມຄອງນັກສຶກສາກ່າວເຕືອນຄວາມຜິດລົງໄປ, ໃຫ້ຖືເອົາຜົນການຕັດສິນຂອງຫ້ອງການຄຸ້ມຄອງນັກສຶກສາເປັນຜົນຕັດສິນຊີ້ຂາດ.
- ນອກຈາກນັ້ນ ໃຫ້ລາຍງານຜົນການຕັດສິນຂອງຫ້ອງການຄຸ້ມຄອງນັກສຶກສາເພື່ອໃຫ້ຄະນະອໍານວຍການພິຈາລະນາ.
ໝວດທີ 5
ວ່າດ້ວຍການຮໍ່າຮຽນການໂອນຍ້າຍຂະແໜງການຮຽນ
- ມາດຕາ 15: ນັກສຶກສາຂອງວິທະຍາໄລເຕັກນິກສັບພະວິຊາ ຕ້ອງປະຕິບັດລະບຽບການຮຽນການປະເມີນຜົນທີ່ ວິທະຍາໄລເຕັກນິກສັບພະວິຊາ ກໍານົດໄວ້ຢ່າງເຂັ້ມງວດ.
- ມາດຕາ 16: ນັກສຶກສາຂອງວິທະຍາໄລເຕັກນິກສັບພະວິຊາ ມີສິດຂໍໂອນຍ້າຍຂະແໜງວິຊາຮຽນໄປຮຽນຂະແໜງວິຊາອື່ນໄດ້, ໂດຍໃຫ້ປະຕິບັດຕາມຂໍ້ກໍານົດວ່າດ້ວຍການປະເມີນຜົນທີ່ວິທະຍໄລກໍານົດໄວ້.
- ມາດຕາ 17: ວິທະຍາໄລເຕັກນິກສັບພະວິຊາອະນຸຍາດໃຫ້ນັກສຶກສາທີ່ເສັງຕົກຈາກວິທະຍາໄລເຕັກນິກສັບພະວິຊາ ກັບຄືນມາສອບເສັງໄດ້ ໂດຍໃຫ້ປະຕິບັດຕາມລະບຽບການສະເພາະທີ່ວິທະຍາໄລກໍານົດໄວ້.
ໝວດທີ 6
ວ່າດ້ວຍການອະນຸຍາດລາພັກ ແລະການສິ້ນສຸດສະຖານະພາບກາເປັນນັກສຶກສາຂອງວິທະຍາໄລເຕັກນິກສັບພະວິຊາ
- ມາດຕາ 18 : ໃນລະຫວ່າງສົກຮຽນການອະນຸຍາດລາພັກ ຂອງນັກສຶກສາ ວິທະຍາໄລເຕັກນິກສັບພະວິຊາ ໃຫ້
ປະຕິບັດຄື :
- ລາພັກ 3 ວັນລົງມາແມ່ນຄຸ້ມຄອງນັກສຶກສາເປັນຜູ້ອະນຸຍາດ.
- ລາພັກກາຍ 3 ວັນ ແມ່ນຜູ້ອໍານວຍການເປັນຜູ້ອະນຸຍາດ ໂດຍຜ່ານຫ້ອງການຄຸ້ມຄອງນັກສຶກສາ.
- ນັກສຶກສາວິທະຍາໄລເຕັກນິກສັບພະວິຊາ ມີສິດຂໍລະພັກໄດ້ແຕ່ບໍ່ໃຫ້ເກີນ 3 ເດືອນ, ຍົກເວັ້ນກໍລະນີພິເສດທີ່ຜູ້ອໍານວຍການ ເຫັນສົມຄວນອະນຸຍາດໃຫ້.
- ມາດຕາ 19 : ສະຖານະພາບການເປັນນັກສຶກສາ ວິທະຍາໄລເຕັກນິກສັບພະວິຊາ ຈະສິ້ນສຸດລົງໃນກໍລະນີຕ່າງໆ ດັ່ງຕໍ່ໄປນີ້ :
- ເສຍຊີວິດ.
- ໄດ້ຮັບອະນຸຍາດລາອອກຕາມການຮ້ອງຂໍ ຂອງຜູ້ກ່ຽວເອງ.
- ຜູ້ກ່ຽວ ໄດ້ຮັບອະນຸຍາດ ໂອນຍ້າຍໄປຮຽນສະຖາບັນການສຶກສາອື່ນພາຍໃນ ຫຼືຕ່າງປະເທດຕາມການຮ້ອງຂໍຂອງຜູ້ກ່ຽວ, ຫຼືຕາມການຊັບຊ້ອນອະນຸມັດຈາກກະຊວງສຶກສາທິການ ແລະ ກິລາ, ຖືກໄລ່ອອກຫຼືຖືກລົບລ້າງຊື່ເປັນນັກສຶກສາຂອງວິທະຍາໄລເຕັກນິກສັບພະວິຊາ.
ໝວດທີ 7
ວ່າດ້ວຍວິໄນ ແລະການຍ້ອງຍໍ
- ມາດຕາ 20 : ນັກສຶກສາຂອງວິທະຍາໄລເຕັກນິກສັບພະວິຊາທຸກຄົນທີ່ມີການປະພຶດຕົນດີ ( ຄະແນນການປະພຶດຖືກຕັດ ບໍ່ເກີນ 60 ຄະແນນ ), ຮຽນເກັ່ງ, ມີຜົນງານດີເດັ່ນປະຕິບັດຂໍ້ກໍານົດ ແລະລະບຽບການຕ່າງໆ ຂອງວິທະຍາໄລເຕັກນິກສັບພະວິຊາໄດ້ດີ, ຈະໄດ້ຮັບການພິຈາລະນາຍ້ອງຍໍຈາກການຈັດຕັ້ງທີ່ກ່ຽວຂ້ອງ ຂອງວິທະຍາໄລ ດ້ວຍຮູບການໃດໜຶ່ງທີ່ ເໝາະສົມດັ່ງຕໍ່ໄປນີ້:
- ຕິດຊື່ ແລະ ຮູບລົງຜະນັງກຽດຂອງຂະແໜງການວິຊາສະເພາະຫຼື ຂອງວິທະຍາໄລເຕັກນິກສັບພະວິຊາ.
- ໃຫ້ບໍາເນັດເປັນເງິນຫຼືວັດຖຸ.
- ຈາລຶກໄວ້ເປັນນັກສຶກສາດີເດັ່ນໃນບັນທຶກຂອງວິທະຍາໄລເຕັກນິກສັບພະວິຊາ.
- ໃຫ້ໃບຍ້ອງຍໍຂອງຜູ້ອໍານວຍການ, ກະຊວງ ແລະ ລັດຖະບານຕາມລໍາດັບ.
- ເມື່ອເສັງຈົບການສຶກສາຈະໄດ້ຮັບການພິຈາລະນາໃຫ້ໄດ້ຮັບໄຊຍະບັດກຽດຕິຄຸນ.
- ມາດຕາ 21 : ນັກສຶກສາຂອງວິທະຍາໄລເຕັກນິກສັບພະວິຊາ ທຸກຄົນທີ່ມີການປະພຶດຕົນບໍ່ດີ, ຝ່າຜືນກົດລະບຽບຂໍ້ກໍານົດຕ່າງໆຂອງວິທະຍາໄລເຕັກນິກສັບພະວິຊາ, ເຮັດຜິດລະບຽບກົດໝາຍ ແລະ ຮີດຄອງປະເພນີ ລ້ວນແຕ່ໄດ້ຮັບການປະຕິບັດວິໄນ ດ້ວຍຮູບການໃດໜຶ່ງທີ່ເໝາະສົມດັ່ງຕໍ່ໄປນີ້ :
- ກ່າວເຕືອນຄວາມຜິດ.
- ກ່າວເຕືອນຄວາມຜິດ ແລະ ແຈ້ງໃຫ້ຜູ້ປົກຄອງຊາບ.
- ຝາກໂທດໄວ້ດ້ວຍຮູບການຂຽນໃບສາລະພາບໂທດ ຫຼື ໃບສໍາຫຼວດຕົນເອງ.
- ລົບລ້າງຜົນການສອບເສັງ, ໄລ່ອອກຈາກຫໍພັກ, ຕັດສິດການໄດ້ຮັບນະໂຍບາຍຕ່າງໆທີ່ຄວນໄດ້ຮັບ
- ຕັດສະຖານະພາບການເປັນນັກສຶກສາ ຂອງວິທະຍາໄລເຕັກນິກສັບພະວິຊາ.
- ມາດຕາ 22 : ການຍ້ອງຍໍຫຼືປະຕິບັດວິໄນ ນັກສຶກສາແຕ່ລະຄັ້ງຕ້ອງໄດ້ຜ່ານການພິຈາລະນາຈາກຄະນະ
ກໍາມະການຍ້ອງຍໍ – ວິໄນຂອງວິທະຍາໄລເຊິ່ງມີລະດັບດັ່ງນີ້ :
- ຄະນະກໍາມະການຍ້ອງຍໍ – ວິໄນຂອງວິທະຍາໄລເຕັກນິກສັບພະວິຊາມີໜ້າທີ່ຄົ້ນຄ້ວາການຍ້ອງຍໍ ແລະ
ປະຕິບັດວິໄນນັກສຶກສາ ເຊິ່ງຄະນະກໍາມະການປະກອບດ້ວຍ :
- ທ່ານຜູ້ອໍານວຍການຫຼືຜູ້ຖືກມອບໝາຍເປັນປະທານ.
- ຮອງຜູ້ອໍານວຍການເປັນຮອງປະທານ
- ຫົວໜ້າພະແນກກິດຈະກໍານັກສຶກສາເປັນຄະນະ.
- ຫົວໜ້າພະແນກແຕ່ລະພະແນກເປັນຄະນະກໍາມະການ .
- ຕົວແທນຂອງອົງການຈັດຕັ້ງມະຫາຊົນ ເປັນຄະນະກໍາມະການ.
- ບັນດາຫົວໜ້າໜ່ວຍງານທີ່ກ່ຽວຂ້ອງເປັນຄະນະກໍາມະການ, ໃນນັ້ນທ່ານຫົວໜ້າໜ່ວຍງານກິດຈະກໍານັກສຶກສາເປັນເລຂານຸການ.
- ການດໍາເນີນງານຂອງຄະນະກໍາມະການຍ້ອງຍໍ – ວິໄນຂັ້ນຕ່າງໆຈະມີຂໍ້ກໍານົດຕ່າງຫາກ.
- ມາດຕາ 23 : ຂອບເຂດສິດໃນການປະຕິບັດວິໄນ ແລະ ການຍ້ອງຍໍນັກສຶກສາແມ່ນ :
- ການປະຕິບັດວິໄນລະດັບກ່າວເຕືອນຄວາມຜິດ, ຂຽນໃບສໍາຫຼວດຕົນເອງ ແລະ ແຈ້ງໃຫ້ຜູ້ປົກຄອງຊາບ ແລະ ການຝາກໂທດ ແມ່ນ ທ່ານ ຫົວໜ້າພະແນກກິດຈະກໍານັກສຶກສາ ເປັນຜູ້ລົງລາຍເຊັນຢັ້ງຢືນ ແລະ ລາຍງານໃຫ້ທ່ານຜູ້ອໍານວຍການວິທະຍາໄລເຕັກນິກສັບພະວິຊາ ຮັບຮູ້ໃນເວລາອັນຄວນ.
- ນອກຈາກນັ້ນ ແມ່ນໃຫ້ຂໍອະນຸມັດ ຈາກທ່ານ ຜູ້ອໍານວຍການວິທະຍາໄລເຕັກນິກສັບພະວິຊາ
ກົດລະບຽບສໍາລັບນັກສຶກສາທີ່ອາໃສຢູ່ໃນຫໍພັກ ວິທະຍາໄລເຕັກນິກສັບພະວິຊາ.
ໝວດທີ 8
ວ່າດ້ວຍນັກສຶກສານອນຫໍພັກ
- ມາດຕາທີ 24: ເງື່ອນໄຂເຂົ້ານອນຫໍພັກ :
24.1 ນັກສຶກສາທີ່ຖືກສັບຊ້ອນ ຫຼື ເສັງເຂົ້າ, ວິທະຍາໄລເຕັກນິກສັບພະວິຊາ ທີ່ມີສຸກຂະພາບດີ ບໍ່ມີພະຍາດຕິດແປດ ລ້ວນແຕ່ມີສິດຂໍອາໃສຢູ່ຫໍພັກໄດ້ ໃນໄລຍະຕະຫຼອດສົກຮຽນ ໂດຍຈະຕ້ອງປະກອບເອກະສານດັ່ງນີ້:
– ໃບຄໍາຮ້ອງຂໍເຂົ້ານອນຫໍພັກ 01 ສະບັບ
– ໃບສັນຍາຄໍ້າປະກັນຂອງຜູ້ປົກຄອງ 01 ສະບັບ
– ໃບຊີວະປະຫວັດ 01 ສະບັບ
– ໃບຢັ້ງຢືນສຸກຂະພາບ 01 ສະບັບ ( ຈາກໂຮງໝໍລັດ )
– ໃບຢັ້ງຢືນກວດສານເສບຕິດ ຈາກໜ່ວຍງານກວດສານເສບຕິດ ວິທະຍາໄລເຕັກນິກສັບພະວິຊາ.
– ຮູບຂະໜາດ 3 x 4 ຈໍານວນ 03 ແຜ່ນ
– ຄ່າບໍາລຸງຮັກສາຫໍພັກ 120,000 ກີບ/ຄົນ/ປີ
24.2 ຄະນະຮັບຜິດຊອບຫໍພັກ ເປັນຜູ້ຄົ້ນຄ້ວານໍາສະເໜີຜ່ານຫ້ອງການຄຸ້ມຄອງນັກສຶກສາ ເພື່ອມີຄໍາເຫັນ ຈາກນັ້ນຈຶ່ງນໍາສະເໜີ ຄະນະອໍານວຍການວິທະຍາໄລເຕັກນິກສັບພະວິຊາ ເພື່ອອະນຸມັດ.
24.3 ນັກສຶກສາທີ່ໄດ້ອະນຸມັດເຂົ້ານອນຫໍພັກແລ້ວ ຕ້ອງໄດ້ເສຍເງິນຄ່າບໍາລຸງຮັກສາຫໍພັກ, ເງິນຄັງຫໍພັກ (ຕຶກທີ່ນອນ) ແລະ ອື່ນໆທຸກໆເດືອນຕາມການຕົກລົງເຫັນດີຢູ່ພາຍໃນກອງປະຊຸມຂອງຕຶກ.
24.4 ນັກສຶກສາທຸກຄົນ ຕ້ອງກຸ້ມຕົນເອງໃນດ້ານວັດຖຸຮັບໃຊ້ສ່ວນຕົວ ອັນເປັນພື້ນຖານຈໍານວນໜຶ່ງເຊັ່ນ: ເຄື່ອງນອນ, ເຄື່ອງໜຸ່ງຫົ່ມ, ເຄື່ອງສໍາພາລະຕ່າງໆ ຕາມຄວາມເໜາະສົມ.
– ນັກສຶກສາທຸກຄົນ ຕ້ອງມີລາຍຊື່ຂອງຕົນ ຕິດໃສ່ດ້ານໜ້າປະຕູຫ້ອງນອນ.
– ນັກສຶກສາຫໍພັກແຕ່ລະຫ້ອງ ຕ້ອງເຮັດອະນາໄມ ແລະ ຮັກສາຄວາມສະອາດຈົບງາມໃນຫ້ອງນອນຂອງຕົນເປັນປະຈໍາໃນແຕ່ລະວັນ.
– ຕອງປັດກວດ, ລ້າງ, ຊັກ ເຄື່ອງນຸ່ງຫົ່ມ, ເຄື່ອງໃຊ້ສອຍຕ່າງໆ ພາຍໃນຫ້ອງນອນຂອງຕົນບໍ່ໃຫ້ມີກິ່ນອັບ, ກິ່ນເຫື່ອ, ກິ່ນເໝັນຕ່າງໆເດັດຂາດ.
- ມາຕາທີ 25: ຄວາມປະພຶດ 14 ຂໍ້ ຂອງນັກສຶກສານອນຫໍພັກ.
25.1 ຕ້ອງປະພຶດຕົນເປັນຜູ້ມີຄຸນສົມບັດດີ ມີຄວາມຮັກແພງສາມັກຄີໝູ່ເພື່ອນ, ນັບຖືພະນັກງານຄູ-ອາຈານ ແລະ ພະນັກງານຮັບຜິດຊອບຫໍພັກ ຢ່າງຖືກຕ້ອງ.
25.2 ຕ້ອງນັບຖືກົດໝາຍບ້ານເມືອງ, ຂໍ້ກໍານົດກົດລະບຽບຂອງຫໍພັກຢ່າງເຂັ້ມງວດ.
25.3 ຕ້ອງເຂົ້າຮ່ວມການປ້ອງກັນເວນຍາມ, ການອອກແຮງງານ, ເຄື່ອນໄຫວກິດຈະກໍາຕ່າງໆ ທີ່ທາງຄະນະຮັບຜິດຊອບຫໍພັກໄດ້ຈັດຂຶ້ນ.
25.4 ຕ້ອງມີການກໍ່ສ້າງ, ຊ່ວຍເຫຼືອຊຶ່ງກັນ ແລະ ກັນ, ມີຄວາມພົວພັນກັນຢ່າງຖືກຕ້ອງ ໂດຍສະເພາະແມ່ນການພົວພັນກັບເພດກົງກັນຂ້າມ.
25.5 ຕ້ອງຮັກສາອານາໄມຄວາມສະອາດ, ຄວາມເປັນລະບຽບຮຽບຮ້ອຍໃນຫໍພັກເຊັ່ນ: ໃນຫ້ອງນອນ, ເຄື່ອງນອນຕ້ອງພັບເປັນລະບຽບ, ເຄື່ອງນຸ່ງຫົ່ມຕ້ອງເກັບເຂົ້າຕູ້ ແລະ ເຄື່ອງໃຊ້ສໍາພາລະຕ່າງໆ ໃຫ້ເກັບມ້ຽນໄວ້ເປັນລະບຽບ ( ໄວ້ໃນຕູ້ຫຼືຮ້ານ ຖ້າມີ )
– ຫ້ອງນໍ້າ, ລະບຽງ, ຂັ້ນໄດທາງຂຶ້ນ ແລະ ບໍລິເວນຫໍພັກ ຕ້ອງອານາໄມຢ່າງເປັນປະຈໍາ.
– ການຕາກເຄື່ອງຂອງຕ່າງໆຕ້ອງຕາກໃສ່ບໍລິເວນທີ່ກໍານົດໃຫ້, ບໍໃຫ້ຕາກຊະຊາຍ.
25.6 ທຸກຄົນມີສິດຊົມໃຊ້ ແລະ ປົກປັກຮັກສາວັດຖຸຕ່າງໆໃນຫໍພັກ, ຖ້າເຫັນວັດຖຸຢູ່ໃນສະພາບທີ່ເປ່ເພໃຫ້ລາຍງານພາກສ່ວນທີ່ກ່ຽວຂ້ອງ ຫຼື ຄະນະຮັບຜິດຊອບຫໍພັກ.
– ຖ້າອຸປະກອນຮັບໃຊ້ ແລະ ສິງຂອງສ່ວນລວມທີ່ທາງການຈັດຕັ້ງປະກອບໃຫ້ ຫາກເປ່ເພເສຍຫາຍແມ່ນພາກ ສ່ວນທີ່ກ່ຽວຂ້ອງ ຫຼືນັກສຶກສາຕຶກດັ່ງກ່າວ, ຫໍພັກຫຼັງດັ່ງກ່າວ ຕ້ອງໄດ້ຮັບຜິດຊອບໃຊ້ແທນ ແລະ ຕິດຕັ້ງໃສ່ຄືນ.
25.7 ນັກສຶກສາທີ່ມີສະຖານະແຕ່ງງານແລ້ວ ບໍ່ມີສິດເອົາລູກ, ເມຍຫຼືຜົວ ເຂົ້າມານອນຢູ່ໃນຫໍພັກນັກສຶກສາ.
25.8 ນັກສຶກສາທີ່ໄດ້ຮັບອະນຸຍາດເຂົ້ານອນຫໍພັກແລ້ວ, ກ່ອນຈະຍ້າຍອອກຈາກຫໍພັກ ຕ້ອງມອບວັດຖຸທີ່ປະກອບໃຫ້ນໍາໃຊ້ໃນຫໍພັກຄືນຄົບຕາມຈໍານວນ, ກໍລະນີເປ່ເພ ຫຼື ເສຍຫາຍຢ່າງບໍ່ສົມເຫດສົມຜົນ ຕ້ອງໃຊ້ແທນຕາມມູນຄ່າຕົວຈິງ ຂອງວັດຖຸດັ່ງກ່າວທີ່ຄະນະຮັບຜິດຊອບຫໍພັກ ເປັນຜູ້ກໍານົດໄວ້.
25.9 ຕ້ອງຮັກສາຊັບສົມບັດຂອງຕົນໃຫ້ດີ ເຊັ່ນ: ເຄື່ອງອຸປະກອນການຮຽນ, ເຄື່ອງໜຸ່ງຫົ່ມ, ເຄື່ອງນໍາໃຊ້ສໍາພາລະຕ່າງໆ ຖ້າມີການເສຍຫາຍ ການຈັດຕັ້ງຫໍພັກ ຈະບໍຮັບຜິດຊອບໃຊ້ແທນຄືນແຕ່ຢ່າງໄດ.
25.10 ການນໍາໃຊ້ໄຟຟ້າ ຕ້ອງນໍາໃຊ້ຢ່າງປະຢັດ ເມື່ອໃຊ້ແລ້ວຕ້ອງມອດໄວ້ທັນທີ, ເມື່ອເຖິງກໍາໜົດເວລານອນ ຫໍພັກທຸກຫຼັງຕ້ອງມອດໄຟໃນຫ້ອງນອນ ຈົ່ງໄວ້ແຕ່ໄຟລະບຽງ ແລະ ໄຟທາງຂຶ້ນ, ຖ້າມີຄວາມຈໍາເປັນຕ້ອງໃຊ້ ແມ່ນໃຫ້ນໍາໃຊ້ຫ້ອງທີ່ການຈັດຕັ້ງໄດ້ກໍານົດໃຫ້ ( ຫ້ອງປະຊຸມຫຼືຫ້ອງອ່ານໜັງສື ).
– ເຄື່ອງທີ່ອະນຸຍາດໃຫ້ນໍາໃຊ້ກະແສໄຟຟ້າໃນຫໍພັກຄື: ຕູ້ເຢັນ, ໝໍ້ກະທະ, ໝໍ້ຕົ້ມນໍ້າ, ເຕົາລີດ, ເຄື່ອງເປົ່າຜົມ, ເຄື່ອງແຖໜວດ, ວິທະຍຸ, ພັດລົມ, ໂທລະທັດ …
– ທຸກຄັ້ງທີ່ອອກຈາກຫ້ອງນອນ ຕ້ອງມອດໄຟ, ພັດລົມ ( ກາງເວັນ ແລະ ກາງຄືນ ).
25.11 ການໃຊ້ນໍ້າປະປາ ຕ້ອງນໍາໃຊ້ຢ່າງປະຢັດ ທຸກຄັ້ງທີ່ນໍາໃຊ້ກ໊ອກນໍ້າຕ້ອງລະມັດລະວັງ ຖ້າເປ່ເພ ຫຼື ເສຍຫາຍ ຍ້ອນຂາດຄວາມຮັບຜິດຊອບ ຕ້ອງໃຊ້ແທນ ພ້ອມຖືກຕັກເຕືອນ ແລະ ປະຕິບັດວິໃນຕາມລະບຽບການ.
25.12 ການກໍານົດເວລາທີ່ຖືກຕ້ອງ ປະຕິບັດຄື:
– ຕອນເຊົ້າເລີ້ມແຕ່ເວລາ 5:30 ໂມງ ຕື່ນນອນ ຫັດກາຍບໍລິຫານ, ອະນາໄມຫ້ອງນໍ້າ, ຫ້ອງນອນ
– ຕອນຄໍ່າ ເລີ້ມແຕ່ເວລາ 21:30 ໂມງ ຂອງວັນເຂົ້າຮຽນ ແລະ 23:00 ຂອງວັນພັກຮຽນ ນັກສຶກສາທຸກຄົນ ຕ້ອງມີໜ້າໃນຫໍພັກ, ຢຸດຕິການຮັບແຂກ ( ໂດຍສະເພາະຫໍພັກຍິງ ) ຮອດ 23:30 ໂມງ ນັກສຶກສາທຸກຄົນຕ້ອງເຂົ້ານອນ.
25.13 ນັກສຶກສາທຸກຄົນຖ້າມີວຽກຈໍາເປັນຕ້ອງການອອກໄປນອກຫໍພັກ ແລະ ຈະກັບມາຊ້າກວ່າ 23:30 ໂມງ ຫຼື ຈະນອນຄ້າງຄືນຢູ່ບ່ອນອື່ນ ຕ້ອງຂໍອະນຸຍາດຈາກຄະນະຮັບຜິດຊອບຫໍພັກກ່ອນ ໂດຍລາຍງານແຈ້ງຈຸດປະສົງບ່ອນໄປຄ້າງຄືນ ເວລາກັບມາຕ້ອງມີເອກະສານອ້າງອີງທີ່ໜ້າເຊື່ອຖື ຈາກບ່ອນທີ່ຕົນໄປພັກນັ້ນ ພາຍໃນຂອບເຂດເວລາ 24 ຊົ່ວໂມງ ( ຫຼື 48 ຊົ່ວໂມງ ).
25.14 ນັກສຶກສາຜູ້ທີ່ມີຈຸດປະສົງຢູ່ຫໍພັກ ໃນຍາມພັກພາກຮຽນ ຕ້ອງຂຽນຄໍາຮ້ອງຕໍ່ຄະນະຮັບຜິດຊອບຫໍພັກລວມ ກ່ອນມື້ປິດສົກຮຽນ( ວັນທີ30ເດືອນ6 ) ແລະ ຜູ້ທີ່ຢູ່ຫໍພັກໃນຍາມດັ່ງກ່າວ ຈະຕ້ອງປະຕິບັດພັນທະ ເຝົ້າ ແລະ ປົກປັກຮັກສາຫໍພັກ, ສໍາລັບນັກສຶກສາທີ່ຈະກັບບ້ານ ຫຼື ຢູ່ນໍາພີ່ນ້ອງ ແລະ ຍາມພັກ ຕ້ອງລາຍງານໃຫ້ຄະນະຮັບຜິດຊອບຫໍພັກ ມອບອຸປະກອນຕ່າງໆ ແລະ ກຸນແຈ.
- ມາດຕາ 26: ( 19 ຂໍ້ຫ້າມ ສໍາລັບນັກສຶກສາທີ່ນອນໃນຫໍພັກ ວິທະຍາໄລເຕັກນິກສັບພະວິຊາ )
- ຫ້າມຈັດຕັ້ງໂຮມຊຸມນຸມອົງການໄດໜຶ່ງຂຶ້ນໃນຫໍພັກໂດຍບໍ່ໄດ້ຮັບອະນຸຍາດ
- ຫ້າມນໍາເອົາອາວຸດເສິກທຸກສະນິດ( ປືນ ຫຼື ວັດຖຸລະເບີດ ) ເຂົ້າມາໃນຫໍພັກເດັດຂາດ.
- ຫ້າມເສບຢາເສບຕິດ ຫຼື ນໍາເອົາຢາເສບຕິດທຸກປະເພດເຂົ້າມາໃນຫໍພັກເດັດຂາດ.
- ຫ້າມລັກໂລບ ຫຼື ສໍ້ໂກງເອົາວັດຖຸຊັບສົມບັດສ່ວນລວມ ເເລະ ຂອງຜູ້ອື່ນມາເປັນຂອງຕົນ.
- ຫ້າມຕີກັນ ຫຼື ຍຸຍົງສົ່ງເສີມ ແລະ ກໍ່ໃຫ້ເກີດຄວາມບໍ່ສະຫງົບຢູ່ພາຍໃນຫໍພັກເດັດຂາດ
- ຫ້າມນໍາເອົາບຸກຄົນພາຍນອກ, ຍາດພີ່ນ້ອງ ເຂົ້າໃນຫໍພັກຫຼືຫ້ອງນອນໂດຍບໍ່ໄດ້ຮັບອະນຸຍາດ.
- ຫ້າມຫຼິ້ນການພະນັນທຸປະເພດທັງພາຍໃນ ແລະ ນອກ ບໍລິເວນຫໍພັກ.
- ຫ້າມຫຼິ້ນກິລາທຸກປະເພດໃນບໍລິເວນຫໍພັກ ( ຫຼິ້ນໄດ້ໃນບໍລິເວນຂອບເຂດທີ່ກໍານົດໃຫ້ ).
- ຫ້າມດື່ມເຫຼົ້າ ແລະ ຂອງມຶນເມົາທຸກປະເພດໃນຫໍພັກ ຫຼື ບໍລິເວນຫໍພັກ.
- ຫ້າມທໍາລາຍ, ເຄື່ອນຍ້າຍອຸປະກອນຕ່າງໆ ( ຫຼືນໍາເຂົ້າມາ ) ໃນຫໍພັກໂດຍບໍ່ໄດ້ຮັບອຸນະຍາດ.
- ຫ້າມສົ່ງສຽງດັງໃນເວລາຜັກຜ່ອນ ຫຼື ເວລານອນເຊິ່ງເປັນການລົບກວນຜູ້ອື່ນ.
- ຫ້າມເຂົ້າຫໍພັກ, ຫ້ອງນອນເພດກົງກັນຂ້າມໂດຍບໍ່ໄດ້ຮັບອະນຸຍາດຈາກຄະນະຮັບຜິດຊອບຫໍພັກ.
- ຫ້າມສໍາລະສິ່ງໂສໂຄກ, ຖິ້ມຂີເຫຍື້ອຊະຊາຍໃນບໍລິເວນຫໍພັກ.
- ຫ້າມທໍາລາຍໜັງສືວາລະສານ, ແຈ້ງການຕ່າງໆ ທີ່ຕິດໄວ້ໃນຫໍຂ່າວ ຫຼື ກະດານຂ່າວຂອງຫໍພັກ.
- ຫ້າມຂີດຂຽນ ຫຼື ຕິດຮູບພາບທີ່ບໍ່ເໝາະສົມໃສ່ຝາຜະໜັງຫ້ອງນອນ ແລະ ບໍລິເວນຫໍພັກ.
- ຫ້າມຕໍ່ ແລະ ຕິດຕັ້ງອຸປະກອນໄຟຟ້າດ້ວຍຕົນເອງໃນຫໍພັກ.
- ຫ້າມປີນຮົ້ວ ຫຼື ກໍາແພງວິທະຍາໄລເຕັກນິກສັບພະວິຊາຢ່າງເດັດຂາດ.
- ຫ້າມນໍາລົດຈັກ, ລົດຖີບ ເຂົ້າໄປຈອດໃນຫໍພັກ ຫຼື ບໍລິເວນຫໍພັກຢ່າງເດັດຂາດ.
- ຫ້າມນັກສຶກສາຊາຍ-ຍິງມານັ່ງລົມກັນຕາມເດີ່ນຫຍ້າຫຼືກ້ອງຮົມໄມ້ໃນເວລາກາງຄືນຢ່າງເດັດຂາດ.
ໝວດທີ 9.
ລະບົບການຈັດຕັ້ງຄຸ້ມຄອງຫໍພັກ
- ມາດຕາທີ 27: ການຄຸ້ມຄອງຫໍພັກນັກສຶກສາ ວິທະຍາໄລເຕັກນິກສັບພະວິຊາ
27.1 ຫ້ອງການຄຸ້ມຄອງນັກສຶກສາ ເປັນເສນາທິການ ໃຫ້ແກ່ຄະນະອໍານວຍການ ວິທະຍາໄລເຕັກນິກສັບພະວິຊາ ໃນການຄຸ້ມຄອງ ຊີ້ນໍາວຽກງານຮອບດ້ານ ໃນຫໍພັກນັກສຶກສາ.
28.2 ໜ່ວຍງານຄຸ້ມຄອງຫໍພັກ ເປັນໜ່ວຍງານຄຸ້ມຄອງນໍາພາຮອບດ້ານ ໃນຫໍພັກນັກສຶກສາ ພາຍໃຕ້ການຊີ້ນໍາໂດຍກົງຮອບດ້ານ ຂອງຫົວໜ້າພະແນກກິດຈະກໍານັກສຶກສາ.
- ມາດຕາທີ 28: ການຈັດຕັ້ງຄຸ້ມຄອງຂັ້ນຕຶກ
28.1 ຫໍພັກແຕ່ລະຕຶກຕ້ອງຈັດຕັ້ງໃຫ້ມີຄະນະຮັບຜິດຊອບ 2-3 ຄົນ ຊຶ່ງແມ່ນນັ້ກສຶກສາໃນຕຶກນັ້ນຄັດເລືອກ ໂດຍໄດ້ຮັບຄໍາເຫັນດີຈາກຄະນະຮັບຜິດຊອບຫໍພັກແລ້ວນໍາສະເໜີຫ້ອງການຄຸ້ມຄອງນັກສຶກສາເປັນຜູ້ແຕ່ງຕັ້ງ.
28.2 ແຕ່ລະຕຶກ, ແຕ່ລະຊັ້ນ, ແຕ່ລະຫ້ອງນອນ ຕ້ອງຈັດຕັ້ງຄະນະຮັບຜິດຊອບ ແຕ່ 1-2 ຄົນ ໂດຍແມ່ນນັກສຶກສາໃນຕຶກນັ້ນ, ຊັ້ນນັ້ນ, ຫ້ອງນອນນັ້ນ ເປັນຜູ້ຄົ້ນຄົ້ວ ໂດຍແມ່ນໄດ້ຮັບຄໍາເຫັນຈາກຄະນະຕຶກ ແລ້ວນໍາສະເໜີຄະນະຮັບຜິດຊອບຫໍພັກ ເປັນຜູ້ແຕ່ງຕັ້ງ.
– ການຄັດເລືອກຄະນະຕຶກ, ຄະນະຊັ້ນ, ຄະນະຫ້ອງນອນ ໃຫ້ດໍາເນີນໃນຕົ້ນສົກຮຽນທຸກໆປີ.
28.3 ຫໍພັກແຕ່ລະຕຶກ ໃຫ້ຈັດຕັ້ງຜູ້ປະຈໍາການ 1 ຄົນ ( ເອີ້ນວ່າປະຈໍາການ )ໂດຍການໝູນວຽນຂອງນັກສຶກສາຕາມຕາຕະລາງທີ່ຈັດວາງໂດຍຄະນະຕຶກ ແລະ ຄະນະຮັບຜິດຊອບຫໍພັກເພື່ອຕິດຕາມ ແລະ ບັນທຶກເຫດການຕ່າງໆ ແລ້ວລາຍງານໃຫ້ຄະນະຮັບຜິດຊອບຫໍພັກລວມເປັນປະຈໍາ ຕັ້ງແຕ່16ໂມງແລງຂອງມື້ນີ້ ເຖິງ 16 ໂມງແລງຂອງມື້ຕໍ່ໄປ( ຕະຫຼອດ 24 ຊົ່ວໂມງ ).
28.4 ໜ້າທີ່:
28.4.1 ຫົວໜ້າຕຶກມີໜ້າທີ່ຮັບຜິດຊອບ:
– ສຶກສາອົບຮົມແນວຄິດ, ຈັດຕັ້ງ ແລະ ການປະຕິບັດກົດລະບຽບຫໍພັກ ຂອງນັກສຶກສາ.
– ວຽກງານນະໂຍບາຍ: ການເຈັບເປັນ, ການຢູ່ການກິນ, ການຍ້ອງຍໍຕໍ່ຜູ້ດີເດັ່ນ ແລະ ປະຕິບັດວິໃນຕໍ່ຜູ້ກະທໍາຜິດ ໂດຍຜ່ານການເຫັນດີຈາກຂັ້ນເທິງຂອງຕົນ.
– ວຽກງານການສະຫຼຸບລາຍງານ ແລະ ຂໍຄໍາເຫັນ ນໍາຂັ້ນເທິງຂອງຕົນ.
28.4.2 ຮອງຜູ້ທີ1:
ຮັບຜິດຊອບກິດຈະກໍາ ແລະ ການອອກແຮງງານລວມຕ່າງໆ ເຊັ່ນ:
– ວຽກງານອະນາໄມຄວາມສະອາດ ແລະ ຄວາມສວຍງາມໃນບໍລິເວນຫໍພັກ.
– ວຽກຄວາມເປັນລະບຽບຮຽບຮ້ອຍໃນບໍລິເວນຫໍພັກ ແລະ ຫ້ອງນອນ.
– ວຽກງານປູກຕົ້ນໄມ້, ສວນດອກໄມ້.
– ວຽກງານກິລາ, ສິນລະປະວັນນະຄະດີ.
28.4.3 ຮອງຜູ້ທີ2:
ຮັບຜິດຊອບປົກປັກຮັກສາພັດສະດຸຕ່າງໆເຊັ່ນ:
- ຮັກສາອາຄານພັດສະດຸຕ່າງໆ ທີ່ປະກອບໃຫ້ເຊັ່ນ: ຕູ້, ຕຽງ, ພັດລົມ, ຫຼອດໄຟ
- ເຄື່ອງມືການອອກແຮງງານ, ເຄື່ອງຫຼິ້ນກິລາ ແລະ ສິນລະປະດົນຕີ
28.4.4 ຫົວໜ້າຫ້ອງນອນຫຼືຊັ້ນ:
– ເປັນຜູ້ຊ່ວຍວຽກຄະນະຕຶກໂດຍມີໜ້າທີ່ຮັບຜິດຊອບນໍາພາການປະຕິບັດກົດລະບຽບຫໍພັກ, ຄວາມເປັນລະບຽບຮຽບຮ້ອຍພາຍໃນຫ້ອງນອນ ເກັບກໍາຜົນງານການເຄື່ອນໄຫວຕ່າງໆຂອງສະມາຊິກພາຍໃນຫ້ອງນອນຂອງຕົນ ແລ້ວລາຍງານໃຫ້ຄະນະຕຶກຂອງຕົນ.
28.4.5 ການຂາດລວມທົ່ວຫໍພັກ, ຕຶກ, ຊັ້ນ ຫຼື ຫ້ອງນອນ ຂອງນັກສຶກສາໂດຍບໍ່ມີເຫດຜົນ ຖືວ່າເປັນການກະທໍາຜິດ ແລະ ຕ້ອງປະຕິບັດວິໃນ ຕາມທີ່ໄດ້ກໍານົດໄວ້ໃນລະບຽບ.
28.5 ສິດ: ຄະນະຕຶກມີສິດດັ່ງນີ້:
28.5.1 ເຂົ້າຮ່ວມກອງປະຊຸມປຶກສາຫາລື ແກ້ໄຂ ແລະ ຕັດສິນບາງບັນຫາ ຕາມການຮຽກເຊີນຂອງຄະນະຮັບຜິດຊອບຫໍພັກ.
28.5.2 ຮຽກປະຊຸມສາມັນ ຫຼື ວິສາມັນໃນຕຶກທີ່ຕົນຮັບຜິດຊອບ ເພື່ອພິຈາລະນາຄົ້ນຄວ້າເຜີຍແຜ່ ແລະ ຈັດຕັ້ງປະຕິບັດແຜນການ, ມະຕິຄໍາສັ່ງຕ່າງໆ ຈາກຄະນະຫໍພັກລວມ.
28.5.3 ກວດກາ, ຕິດຕາມ ແລະ ຕັກເຕືອນນັກສຶກສາທີ່ກະທໍາຜິດລະບຽບ ໃນຕຶກຂອງຕົນ.
28.5.4 ນໍາສະເໜີ, ລາຍງານສະພາບຕ່າງໆໃຫ້ຄະນະຮັບຜິດຊອບຫໍພັກລວມຮັບຮູ້.
28.5.5 ຫົວໜ້າຫ້ອງນອນ ມີສິດປະຕິບັດຄ້າຍຄືຂ້າງເທິງ ແຕ່ໃຫ້ໃຊ້ສະເພາະພາຍໃນລະດັບ ແລະ ຂອບເຂດຫ້ອງນອນຂອງຕົນເທົ່ານັ້ນ.
ມາດຕາ 29: ນັກສຶກສາທີ່ໄດ້ຮັບການຄັດເລືອກ ແລະ ແຕ່ງຕັ້ງໃຫ້ເປັນຄະນະຕຶກ ຈະໄດ້ຮັບການປະຕິບັດນະໂຍບາຍດັ່ງນີ້:
29.1 ບໍ່ໄດ້ເສຍເງິນບໍາລຸງຫໍພັກ
29.2 ໄດ້ຮັບຄວາມສະດວກທີ່ຈໍາເປັນບາງຢ່າງ ເພື່ອປະຕິບັດໜ້າທີ່ວຽກງານຂອງຕົນ.
29.3 ນະໂຍບາຍອື່ນໆຕາມຫຼັກການລວມ ຂອງວິທະຍາໄລເຕັກນິກສັບພະວິຊາ.
ໝວດທີ 10
ວ່າດ້ວຍການຈັດຕັ້ງປະຕິບັດ
ມາດຕາ 30: ວ່າດ້ວຍການປະຕິບັດວິໃນ ແລະ ການຍ້ອງຍໍ.
30.1 ການປະຕິບັດວິໃນ:
30.1.1 ການປະຕິບັດວິໃນຕໍ່ຜູ້ກະທໍາຜິດ ແມ່ນໃຫ້ປະຕິບັດຕາມການກໍນົດໄວ້ ໃນກົດລະບຽບຂອງນັກສຶກສານອນໃນຫໍພັກ ວິທະຍາໄລເຕັກນິກສັບພະວິຊາ.
30.1.2 ໃນໄລຍະ 1 ປີ ( ນັບແຕ່ວັນທີ 1 ກັນຍາເປັນຈຸດເລີ້ມຕົ້ນ )
– ນັກສຶກສາຫໍພັກ ທີ່ຖືກຕັດຄະແນນ ຕາມການປະພຶດ ແຕ່ 60-120 ຄະແນນ ຈະຖືກຕັກເຕືອນ ຈາກຄະນະຮັບຜິດຊອບຫໍພັກລວມ ພ້ອມທັງຂຽນ ແລະ ສົ່ງໃບສໍາຫຼວດໄວ້ເປັນຫຼັກຖານຢູ່ຫ້ອງ ການຄຸ້ມຄອງນັກສຶກສາ.
– ນັກສຶກສາ ທີ່ຖືກຕັດຄະແນນຕາມການປະພຶດແຕ່ 120-200 ຄະແນນ ຈະຖືກຫ້ອງການຄຸ້ມຄອງນັກສຶກສາ ເຊີນຜູ້ປົກຄອງ ແລະ ຜູ້ກ່ຽວມາພົບເພື່ອຕັກເຕືອນ ພ້ອມທັງຂຽນໃບປະຕິຍານໂດຍຮັບຮູ້ຈາກຜູ້ປົກຄອງ.
– ນັກສຶກສາທີ່ຖືກຕັດຄະແນນ ຕາມການປະພຶດແຕ່ 200 ຄະແນນ ຂຶ້ນໄປ ຈະຖືກໄລອອກຈາກຫໍພັກໂດຍບໍ່ມີເງື່ອນໄຂ.
30.2 ການຍ້ອງຍໍ:
30.2.1 ຍ້ອງຍໍລວມໝູ່ຫໍພັກ ຫຼື ຫ້ອງນອນທີ່ຄົບຕາມເງື່ອນໄຂດັ່ງນີ້:
– ບໍ່ຖືກຕັດຄະແນນຄວາມປະພຶດຂອງນັກສຶກສາ.
– ມີຄວາມສະອາດ, ເປັນລະບຽບຮຽບຮ້ອຍ ແລະ ເປັນແບບຢ່າງ ໃຫ້ແກ່ຫໍພັກຫຼັງອື່ນໆ ຫຼື ຫ້ອງນອນອື່ນ ຕະຫຼອດສົກຮຽນ.
– ມີຄວາມສະຫງົບປອດໄພ, ມີຄວາມສາມັກຄີເປັນເອກະພາບ ແລະ ບໍ່ມີເຫດການໄດເກີດຂຶ້ນ ຕະຫຼອດສົກຮຽນ.
30.2.2 ຍ້ອງຍໍບຸກຄົນດີເດັ່ນ, ບຸກຄົນທີ່ຄົບຕາມເງື່ອນໄຂລຸ່ມນີ:
– ເປັນຜູ້ທີ່ຮຽນດີ, ມີຄຸນສົມບັດດີ, ມີຄວາມສາມັກຄີ ແລະ ໄດ້ຮັບຄວາມເຊື່ອຖືຈາກໝູ່ເພື່ອນ.
– ມີຄວາມຫ້າວຫັນປະກອບສ່ວນຕໍ່ວຽກງານທີ່ມອບໝາຍໃຫ້.
– ປະຕິບັດກົດລະບຽບຫໍພັກໄດ້ດີ ແລະ ບໍ່ຖືກຕັດຄະແນນຄວາມປະພຶດ.
– ໄດ້ຮັບຄວາມເຫັນດີຈາກຄະນະຕຶກ, ຫົວໜ້າຫ້ອງນອນ ແລະ ພະນັກງານຊີ້ນໍາຫໍພັກ.
ມາດຕາ 31: ການພົ້ນສະພາບເປັນນັກສຶກສາຫໍພັກ:
31.1 ເສຍຊີວິດ.
31.2 ໄດ້ຮັບປະກາຊະນີຍະບັດ ຈົບຈາກວິທະຍາໄລເຕັກນິກສັບພະວິຊາ.
31.3 ຂໍອອກຈາກຫໍພັກໂດຍໄດ້ຮັບອະນຸຍາດ.
31.4 ຖືກໄລອອກຈາກວິທະຍາໄລເຕັກນິກສັບພະວິຊາ.
31.5 ຖືກຕັດຄະແນນຄວາມປະພຶດ 200 ຄະແນນ ຂຶ້ນໄປ ( ຖືກໄລ່ອອກຫໍພັກ ).
ມາດຕາ 32: ວ່າດ້ວຍການຄວບຄຸມການປະພຶດຂອງນັກສຶກສານອນຫໍພັກ ວິທະຍາໄລເຕັກນິກສັບພະວິຊາ:
ຕາຕະລາງທີ1: ປະເພດຄວາມຜິດ ແລະ ຄະແນນທີ່ຖືກຕັດ
| ລ/ດ | ປະເພດການກະທໍາຜິດ ຕໍ່ກົດລະບຽບຂອງຫໍພັກ | ຄະແນນທີ່ຖືກຕັດ/1 ຄັ້ງ | ໝາຍເຫດ |
| 1 | ຈັດຕັ້ງໂຮມຊຸມນຸມອົງການໄດໜຶ່ງຂຶ້ນໃນຫໍພັກໂດຍບໍ່ໄດ້ຮັບອະນຸຍາດ | 300 | ພ້ອມທັງປັບໃໝ, ໄລ່ອອກຫໍພັກ |
| 2 | ນໍາເອົາອາວຸດເສິກທຸກສະນິດ ( ປືນ ຫຼື ວັດຖຸລະເບີດ ) ເຂົ້າມາໃນຫໍພັກ. | 300 | ພ້ອມທັງປັບໃໝ, ໄລ່ອອກຫໍພັກ |
| 3 | ເສບຢາເສບຕິດ–ຂາຍຢາເສບຕິດ ຫຼື ນໍາເອົາຢາເສບຕິດທຸກປະເພດເຂົ້າມາໃນຫໍພັກ. | 300 | ພ້ອມທັງປັບໃໝ, ໄລ່ອອກຫໍພັກ |
| 4 | ລັກໂລບ ຫຼື ສໍ້ໂກງເອົາວັດຖຸຊັບສົມບັດສ່ວນລວມ ເເລະ ຂອງຜູ້ອື່ນມາເປັນຂອງຕົນ. | 200 | ພ້ອມທັງຂຽນໃບສໍາຫຼວດ, ໄລ່ອອກຫໍພັກ |
| 5 | ຕີກັນ ຫຼື ຍຸຍົງສົ່ງເສີມ ແລະ ກໍ່ໃຫ້ເກີດຄວາມບໍ່ສະຫງົບຢູ່ພາຍໃນຫໍພັກ | 250 | ພ້ອມທັງປັບໃໝ, ໄລ່ອອກຫໍພັກ |
| 6 | ນໍາເອົາຄົນນອກ, ຍາດຕິພີ່ນ້ອງເຂົ້ານອນໃນຫໍພັກ ໂດຍບໍ່ໄດ້ຮັບອະນຸຍາດ. | 100-200 | ພ້ອມທັງຂຽນໃບສໍາຫຼວດ, ໄລ່ອອກຫໍພັກ |
| 7 | ຫຼິ້ນການພະນັນທຸປະເພດທັງພາຍໃນ ແລະ ນອກ ບໍລິເວນຫໍພັກ. | 200 | ພ້ອມທັງປັບໃໝ, ໄລ່ອອກຫໍພັກ |
| 8 | ຫຼິ້ນກິລາທຸກປະເພດໃນບໍລິເວນຫໍພັກ ( ຫຼິ້ນໄດ້ໃນບໍລິເວນຂອບເຂດທີ່ກໍານົດໃຫ້ ). | 100 | ພ້ອມທັງຂຽນໃບສໍາຫຼວດຕົນເອງ |
| 9 | ດື່ມເຫຼົ້າ ແລະ ຂອງມຶນເມົາທຸກປະເພດໃນຫໍພັກ ຫຼື ບໍລິເວນຫໍພັກ. | 150-200 | ພ້ອມທັງຂຽນໃບສໍາຫຼວດ, ໄລ່ອອກຫໍພັກ |
| 10 | ເມົາເຫຼົ້າແລ້ວອາລະວາດວຸ້ນວາຍ | 200 | ພ້ອມທັງປັບໃໝ, ໄລ່ອອກຫໍພັກ |
| 11 | ທໍາລາຍ, ເຄື່ອນຍ້າຍອຸປະກອນຕ່າງໆ( ຫຼືນໍາເຂົ້າມາ )ໃນຫໍພັກໂດຍບໍ່ໄດ້ຮັບອຸນະຍາດ | 50 | ພ້ອມທັງຂຽນໃບສໍາຫຼວດຕົນເອງ |
| 12 | ສົ່ງສຽງດັງໃນເວລາຜັກຜ່ອນ ຫຼື ເວລານອນເຊິ່ງເປັນການລົບກວນຜູ້ອື່ນ. | 50-100 | ພ້ອມທັງຂຽນໃບສໍາຫຼວດຕົນເອງ |
| 13 | ເຂົ້າຫໍພັກ, ຫ້ອງນອນເພດກົງກັນຂ້າມ ໂດຍບໍ່ໄດ້ຮັບອະນຸຍາດ. | 100-200 | ຂຽນໃບສໍາຫຼວດ, ປັບໃໝ, ໄລ່ອອກຫໍພັກ |
| 14 | ສໍາລະສິ່ງໂສໂຄກ, ຖິ້ມຂີເຫຍື້ອຊະຊາຍໃນບໍລິເວນຫໍພັກ. | 50-100 | ພ້ອມທັງຂຽນໃບສໍາຫຼວດຕົນເອງ |
| 15 | ທໍາລາຍໜັງສືວາລະສານ, ແຈ້ງການຕ່າງໆ ທີ່ຕິດໄວ້ໃນຫໍຂ່າວ ຫຼື ກະດານຂ່າວ | 50 | ພ້ອມທັງຂຽນໃບສໍາຫຼວດຕົນເອງ |
| 16 | ຂີດຂຽນ ຫຼື ຕິດຮູບພາບທີ່ບໍ່ເໝາະສົມໃສ່ຝາຜະໜັງຫ້ອງນອນ ແລະ ບໍລິເວນຫໍພັກ. | 50 | ພ້ອມທັງຂຽນໃບສໍາຫຼວດຕົນເອງ |
| 17 | ຕໍ່ ແລະ ຕິດຕັ້ງອຸປະກອນໄຟຟ້າດ້ວຍຕົນເອງໃນຫໍພັກ ໂດຍບໍ່ໄດ້ຮັບອະນຸຍາດ | 50 | ພ້ອມທັງຂຽນໃບສໍາຫຼວດຕົນເອງ |
| 18 | ປີນຮົ້ວຫຼືກໍາແພງ ວິທະຍາໄລເຕັກນິກສັບພະວິຊາ. | 50 | ພ້ອມທັງຂຽນໃບສໍາຫຼວດຕົນເອງ |
| 19 | ນໍາເອົາລົດຈັກ, ລົດຖີບ ເຂົ້າໄປຈອດໃນຫໍພັກ ຫຼື ບໍລິເວນຫໍພັກ. | 200 | ຂຽນໃບສໍາຫຼວດ, ປັບໃໝ, ໄລ່ອອກຫໍພັກ |
| 20 | ນັກສຶກສາຊາຍ ແລະ ຍິງມານັ່ງລົມກັນຕາມເດີ່ນຫຍ້າຫຼືກ້ອງຮົມໄມ້ໃນເວລາກາງຄືນ. | 200 | ພ້ອມທັງຂຽນໃບສໍາຫຼວດ, ໄລ່ອອກຫໍພັກ |
| 21 | ພົວພັນເພດແບບຜິດຮີດຄອງປະເພນີມີການຮ້ອງຟ້ອງຫຼືມີຫຼັກຖານພະຍານຄົບຖ້ວນ | 300 | ພ້ອມທັງປັບໃໝ, ໄລ່ອອກຫໍພັກ |
| 22 | ຜິດຖຽງກັນໂດຍໃຊ້ວາຈາບໍ່ສຸພາບ | 100-150 | ພ້ອມທັງຂຽນໃບສໍາຫຼວດຕົນເອງ |
| 23 | ບໍ່ປະຕິບັດຄໍາສັ່ງ ຫຼື ໃຊ້ວາຈາບໍ່ສຸພາບຕໍ່ພະນັກງານຄູ-ອາຈານ | 150-200 | ພ້ອມທັງຂຽນໃບສໍາຫຼວດ, ໄລ່ອອກຫໍພັກ |
| 24 | ບໍ່ເຂົ້າຮ່ວມການອອກແຮງງານ, ອະນາໄມ, ການເຄື່ອນໄຫວກິດຈະກໍາອື່ນໆ | 150-250 | ພ້ອມທັງຂຽນໃບສໍາຫຼວດ, ໄລ່ອອກຫໍພັກ |
| 25 | ຂາດປະຊຸມ | 100-150 | ພ້ອມທັງຂຽນໃບສໍາຫຼວດຕົນເອງ |
| 26 | ປອມແປງຫຼືທໍາລາຍເອກະສານຫໍພັກ | 200 | ພ້ອມທັງຂຽນໃບສໍາຫຼວດ, ໄລ່ອອກຫໍພັກ |
| 28 | ເອົາຄົນບໍ່ດີ ( ປະເພດໂຕນຄຸກ, ຜູ້ທີ່ເຈົ້າໜ້າທີ່ພວມນໍາຈັບ ) ເຂົ້າມາໃນຫໍພັກ | 300 | ພ້ອມທັງປັບໃໝ, ໄລ່ອອກຫໍພັກ |
| 29 | ເອົາຄົນບໍ່ດີ ( ປະເພດໂສເພນີ, ຄົນເສບຢາເສບຕິດ, ຄົນເກເລ ) ເຂົ້າມາໃນຫໍພັກ | 200 | ຂຽນໃບສໍາຫຼວດ, ປັບໃໝ, ໄລ່ອອກຫໍພັກ |
- ການກະທໍາຜິດທີ່ບໍໄດ້ກໍານົດໄວ້ໃນມາດຕາ 35 ໃຫ້ອີງຕາມກົດລະບຽບສະເພາະ ( ຖ້າມີ ) ຫຼືອີງຕາມຕາຕະລາງທີ 1 ເພື່ອພິຈາລະນາຕັດຄະແນນຄວາມປະພຶດ.
- ການຈັດປະເພດຄວາມປະພຶດ ແລະ ຜົນການຕັດສິນ, ໃຫ້ປະຕິບັດຕາມຕາຕະລາງທີ 2
ຕາຕະລາງທີ 2: ຜົນການຕັດສິນ ຄະແນນ ຄວາມປະພຶດ:
| ຄະແນນທີ່ຖືກຕັດ | ຄະແນນທີ່ຍັງເຫຼືອ | ຜົນການຕັດສິນ. |
| 01 – 50 | 250 – 300 | ເປັນນັກສຶກສາທີ່ມີການປະພຶດດີ. |
| 51 – 100 | 200 – 249 | ເປັນນັກສຶກສາທີ່ມີການປະພຶດທໍາມະດາ. |
| 101 – 200 | 100 – 199 | ເປັນນັກສຶກສາທີ່ມີການປະພຶດບໍ່ເໝາະສົມ ແລະ ມີການຕັກເຕືອນເປັນລາຍລັກອັກ ສອນຈາກຫ້ອງການຄຸ້ມຄອງນັກສຶກສາ ແລະ ເຊີນຜູ້ປົກຄອງມາພົບເພື່ອຮັບຮູ້ກ່ຽວກັບການປະພຶດທີ່ບໍ່ເໝາະສົມ ຂອງນັກສຶກສາຄົນດັ່ງກ່າວ. |
| 201 ຂຶ້ນໄປ | 01 – 99 | ໝົດສະພາບເປັນນັກສຶກສານອນຫໍພັກຂອງ ວິທະຍາໄລເຕັກນິກສັບພະວິຊາ. |
ຕາຕະລາງທີ 3: ການປັບໃໝ ແລະ ໃຊ້ແທນຄືນ.
| ລ/ດ | ປະເພດການກະທໍາຜິດ ຕໍ່ກົດລະບຽບຂອງຫໍພັກ | ຄ່າປັບໃໝ/ຄົນ/ຄັ້ງ | ໝາຍເຫດ |
| 1 | ຈັດຕັ້ງໂຮມຊຸມນຸມ, ຈັດຕັ້ງອົງການໄດໜຶ່ງຂຶ້ນໃນຫໍພັກໂດຍບໍ່ໄດ້ຮັບອະນຸຍາດ | 300,000 ກີບ | |
| 2 | ນໍາເອົາອາວຸດເສິກທຸກສະນິດ ( ປືນ ຫຼື ວັດຖຸລະເບີດ ) ເຂົ້າມາໃນຫໍພັກ. | 300,000 ກີບ | |
| 3 | ເສບຢາເສບຕິດ–ຂາຍຢາເສບຕິດ ຫຼື ນໍາເອົາຢາເສບຕິດທຸກປະເພດເຂົ້າມາໃນຫໍພັກ. | 600,000 ກີບ | |
| 4 | ລັກໂລບ ຫຼື ສໍ້ໂກງເອົາວັດຖຸຊັບສົມບັດສ່ວນລວມ ເເລະ ຂອງຜູ້ອື່ນມາເປັນຂອງຕົນ. | 300,000 ກີບ | |
| 5 | ຕີກັນ ຫຼື ຍຸຍົງສົ່ງເສີມ ແລະ ກໍ່ໃຫ້ເກີດຄວາມບໍ່ສະຫງົບຢູ່ພາຍໃນຫໍພັກ | 300,000 ກີບ | |
| 6 | ຫຼິ້ນການພະນັນທຸປະເພດທັງພາຍໃນ ແລະ ນອກ ບໍລິເວນຫໍພັກ. | 100,000 ກີບ | |
| 7 | ດື່ມເຫຼົ້າ ແລະ ຂອງມຶນເມົາທຸກປະເພດໃນຫໍພັກ ຫຼື ບໍລິເວນຫໍພັກ. | 100,000 ກີບ | |
| 8 | ເມົາເຫຼົ້າແລ້ວອາລະວາດວຸ້ນວາຍ ເຮັດໃຫ້ຊັບສົມບັດສ່ວນລວມເສຍຫາຍ | 500,000 ກີບ | ພ້ອມໃຊ້ແທນຄືນ |
| 9 | ທໍາລາຍ, ເຄື່ອນຍ້າຍອຸປະກອນຕ່າງໆ(ຫຼືນໍາເຂົ້າມາ)ໃນຫໍພັກໂດຍບໍ່ໄດ້ຮັບອຸນະຍາດ. | 150,000 ກີບ | ພ້ອມໃຊ້ແທນຄືນ |
| 10 | ເຂົ້າຫໍພັກ, ຫ້ອງນອນເພດກົງກັນຂ້າມ ໂດຍບໍ່ໄດ້ຮັບອະນຸຍາດ. | 100,000 ກີບ | |
| 11 | ສໍາລະສິ່ງໂສໂຄກ, ຖິ້ມຂີເຫຍື້ອຊະຊາຍໃນບໍລິເວນຫໍພັກ. | 20,000 ກີບ | ອະນາໄມຄືນ |
| 12 | ທໍາລາຍວາລະສານ, ແຈ້ງການຕ່າງໆ ທີ່ຕິດໄວ້ໃນຫໍຂ່າວ ຫຼື ກະດານຂ່າວຂອງຫໍພັກ. | 50,000 ກີບ | ພ້ອມໃຊ້ແທນຄືນ |
| 13 | ຂີດຂຽນ ຫຼື ຕິດຮູບພາບທີ່ບໍ່ເໝາະສົມໃສ່ຝາຜະໜັງຫ້ອງນອນ ແລະ ບໍລິເວນຫໍພັກ. | 20,000 ກີບ | ອະນາໄມຄືນ |
| 14 | ປີນຮົ້ວ ຫຼື ກໍາແພງ ຂອງວິທະຍາໄລເຕັກນິກສັບພະວິຊາ. | 50,000 ກີບ | |
| 15 | ນໍາລົດຈັກ, ລົດຖີບ ເຂົ້າໄປຈອດໃນຫໍພັກ ຫຼື ບໍລິເວນຫໍພັກ. | 120,000 ກີບ | |
| 16 | ພົວພັນເພດແບບຜິດຮີດຄອງປະເພນີມີການຮ້ອງຟ້ອງຫຼືມີຫຼັກຖານພະຍານຄົບຖ້ວນ | 300,000 ກີບ | |
| 17 | ຜິດຖຽງກັນໂດຍໃຊ້ວາຈາບໍ່ສຸພາບ | 150,000 ກີບ | |
| 18 | ປອມແປງຫຼືທໍາລາຍເອກະສານຫໍພັກ | 150,000 ກີບ | |
| 19 | ເອົາຄົນບໍ່ດີ ( ປະເພດໂຕນຄຸກ, ຜູ້ທີ່ເຈົ້າໜ້າທີ່ພວມນໍາຈັບ ) ເຂົ້າມາໃນຫໍພັກ | 500,000 ກີບ | |
| 20 | ເອົາຄົນບໍ່ດີ ( ປະເພດໂສເພນີ, ຄົນເສບຢາເສບຕິດ, ຄົນເກເລ ) ເຂົ້າມາໃນຫໍພັກ | 300,000 ກີບ |
- ການກະທໍາຜິດຂອງນັກສຶກສາໃນແຕ່ລະກໍລະນີທີ່ຖືກປັບໃໝ ຫາກເປັນຄັ້ງທີ 2 ຫຼື 3 ຄ່າປັບໃໝແມ່ນຈະຄູນ 2 ຫຼື 3 ຕາມຈໍານວນຄັ້ງທີ່ກະທໍາຜິດຕໍ່ກົດລະບຽບ.
- ການກະທໍາຜິດທີ່ບໍ່ໄດ້ກໍານົດຄ່າປັບໃໝໄວ້ໃນມາດຕາທີ 35 ໃຫ້ອີງຕາມກົດລະບຽບສະເພາະ (ຖ້າມີ) ຫຼື ອີງຕາມຕາຕະລາງທີ 3 ເພື່ອພິຈາລະນາຄ່າປັບໃໝ.
- ຄະນະຮັບຜິດຊອບລວມ ມີໜ້າທີ່ຈັດຕັ້ງເຜີຍແຜ່ກົດລະບຽບ ສະບັບນີ້ ໃຫ້ນັກສຶກສາຫໍພັກຂອງຕົນຮັບຮູ້ ແລະ ເຊື່ອມຊຶມ ໃນຕົ້ນສົກຮຽນຂອງທຸກໆປີ.
- ກໍານົດການລວມ, ປະຊຸມເກັບກໍາສະພາບຂອງນັກສຶກສາຫໍພັກມີດັ່ງນີ້:
- ແລງວັນສຸກ ອາທິດທີ 3 ຂອງເດືອນ ລວມປະຊຸມພາຍໃນແຕ່ລະຫ້ອງນອນ, ເນື້ອໃນປະຊຸມແມ່ນ ສັງເກດການປະຕິບັດລະບຽບຫ້ອງການ ເຂົ້າ-ອອກ ຫໍພັກສະພາບການດໍາລົງຊີວິດ ແລະ ການເຄື່ອນໄຫວກິດຈະກໍາຕ່າງໆ ແລ້ວລາຍງານໃຫ້ຄະນະຮັບຜິດຊອບຕຶກ.
- ແລງວັນສຸກ ອາທິດທີ 4 ລວມປະຊຸມຄະນະຮັບຜິດຊອບຕຶກ ໂດຍການເປັນປະທານ ຂອງຄະນະຮັບຜິດຊອບຫໍພັກລວມ, ເນື້ອໃນສະຫຼຸບສະພາບການປະຕິບັດລະບຽບຫໍພັກ, ການເຄື່ອນໄຫວກິດຈະກໍາຕ່າງໆໃນ 1 ເດືອນຜ່ານມາ ພິຈາລະນາ ແລະ ແກ້ໄຂບາງບັນຫາທີ່ເຫັນວ່າມີຄວາມຈໍາເປັນຕາມການກໍານົດໄວ້ ໃນການຫຼັກການລວມ ແລະ ສັງເກດຂໍ້ສະເໜີຕ່າງໆ ແລ້ວລາຍງານໃຫ້ຂັ້ນເທິງຂອງຕົນຕາມເວລາກໍານົດ.
- ວາງແຜນການເຄື່ອນໄຫວໃນເດືອນຕໍ່ໄປ.
- ທຸກໆ 3 ເດືອນ ຕ້ອງລວມຄະນະຮັບຜິດຊອບຫໍພັກ ເພື່ອສະເໜີຕີລາຄາວຽກງານຜ່ານມາ ແລ້ວວາງທິດທາງຕໍ່ໜ້າ, ຈາກນັ້ນຈຶ່ງເຕົ້າໂຮມນັກສຶກສາທັງໝົດ ໃນຫໍພັກ ເພື່ອຜ່ານບົດສະຫຼຸບ ໃນກໍລະນີຈໍາເປັນ ຄະນະຮັບຜິດຊອບຫໍພັກລວມ ແລະ ແຜນການດັ່ງກ່າວອາດສະເໜີຂໍປ່ຽນແປງຫຼືເພີ່ມເຕີມບາງຂໍ້ຄວາມໃນກົດລະບຽບສະບັບນີ ໄດ້ເພື່ອໃຫ້ແທດເໝາະກັບສະພາບຕົວຈິງ ແຕ່ລະຂໍ້ປ່ຽນແປງຫຼືເພີ່ມເຕີມເຫຼົ່ານັ້ນ ຕ້ອງເປັນການເຫັນດີຈາກຄະນະອໍານວຍການ ກົດລະບຽບສະບັບນີ້ມີ 11 ໝວດ ແລະ 35 ມາດຕາ ມີຜົນບັງຄັບໃຊ້ໃນຂອບເຂດ ວິທະຍາໄລເຕັກນິກສັບພະວິຊາ ນັບແຕ່ມື້ລົງລາຍເຊັນເປັນຕົ້ນໄປ.
ໝວດທີ 11
ຂໍ້ກໍານົດມ້ວນທ້າຍ
- ມາດຕາ 33 : ກົດລະບຽບສະບັບນີ້ ໃຊ້ໄດ້ໃນ ວິທະຍາໄລເຕັກນິກສັບພະວິຊາ ທຸກໆຂໍ້ກໍານົດທີ່ມີເນື້ອໃນຂັດກັບກົດລະບຽບສະບັບນີ້ລ້ວນແຕ່ຖືກລົບລ້າງ.
- ມາດຕາ 34 : ໃນກໍລະນີທີ່ເຫັນວ່າມີຄວາມຈໍາເປັນ ທ່ານຜູ້ອໍານວຍການວິທະຍາໄລເຕັກນິກສັບພະວິຊາ, ຫົວໜ້າຫ້ອງການທີ່ກ່ຽວຂ້ອງ ກໍ່ມີສິດອອກຂໍ້ແນະນໍາເພື່ອ ອະທິບາຍເພີ່ມເຕີມເນື້ອໃນ, ໃນມາດຕາໃດໜຶ່ງ, ໝວດໃດໜຶ່ງຂອງກົດລະບຽບສະບັບນີ້ໄດ້ ແຕ່ບໍ່ໃຫ້ຂັດກັບເນື້ອໃນຂອງກົດລະບຽບສະບັບນີ້.
- ມາດຕາ 35 : ກົດລະບຽບສະບັບນີ້ ມີຜົນບັງຄັບໃຊ້ນັບແຕ່ມື້ ຜູ້ອໍານວຍການວິທະຍາໄລເຕັກນິກສັບພະວິຊາ ລົງລາຍເຊັນເປັນຕົ້ນໄປ.
ລະບຽບການອື່ນໆທີ່ຂັດກັບກົດລະບຽບສະບັບນີ້ລ້ວນແຕ່ຖືກລົບລ້າງ.
ຜູ້ອໍານວຍການວິທະຍາໄລເຕັກນິກສັບພະວິຊາ